Berekat Tuhan - Sermon by Canon James Juhari

 

Advent 4 Readings: 

OT: 2 Samuel 7:1-11,16

Epistle: Romans 16:25-end

Gospel: Luke 1:26-38

Sermon

Pagi tu aku deka bejakuka pasal berekat.  Mayuh kitai Kristian arapka pasal berekat Tuhan, lalu semua kitai dekaka pengidup diri diberekat.  Penanggul iya nya mayuh kitai enda nemu nama utai ti dikumbai berekat Tuhan laban kitai suah ngaul berekat nya enggau 2pengaya, pengerai enggau penyamai idup. Kedua, kitai enda nemu baka ni ngulih berekat enggau ngena iya.  Orang ngangau paderi laban mayuh kebuah: ari merekatka rumah, tanah, tanda kubur, regang, kerita, ngagai merekatka orang betunang enggau nikah.  Nya alai sekeda orang nyangka enti paderi ngengkahka jari datas pala sida lalu besampika sida, sida nerima berekat Tuhan.  3Sekeda orang nyangka enti paderi ngereja ‘ritual’ (baka ngunsai ai kudus ba rumah, bilik tauka kerita) tauka sida meri sedekah ngagai gerija, sida deka bulih berekat Tuhan.  Pengawa ti ngengkah jari atas pala enggau ngunsai ai kudus nya “pengawa merekat” ti nandaka kitai besetuju nyerahka pengidup kitai enggau utai ti dikemisi kitai ngagai jari Tuhan. Pengawa meri sedekah nya tanda terima kasih, ukai dikena kitai “meli” berekat Tuhan.

Pekara ti deka dibai aku peratika kitai nya 4“Nama reti pengidup ti diberekat Allah Taala, enggau baka ni ku gaya pengidup orang ti beberekat”.  Kitai berengkah ba Bup Kudus laban iya ngembuan mayuh cherita pasal Allah Taala ti merekatka nembiak Iya, lebuh Iya nulung bansa Israel pansut ari menua Ejip lalu tama ngagai menua ti udah disemaya Iya.  Dia kitai meda bakani Iya ngena Moses, Aaron, Joshua enggau bala sedadu orang Israel ngulihka juluk Iya.   Lebuh rumah sembiang digaga jeman Raja Solomon, orang meri duit enggau sekeda ari reta sida kena meli kayu-ramu, batu-bata enggau utai kena ngias rumah sembiang nya, enggau kena ngaji orang ti gawa.  Lebuh Jesus bejalaika ministri Iya, Iya milih 12 iku orang nyadi murid Iya.  5Tu utai ti dipelajarka kitai ari Bup Kudus: Tuhan naburka berekat Iya nengah orang ti nyadi tuai, orang ti bekereja enggau sida, enggau orang ti meri duit enggau utai bukai kena nyukung pengawa sida.  Allah Taala nya Tuhan ti ngaga sereta bekuasa atas semua utai; tang lebuh Iya deka naburka berekat Iya, Iya begunaka saup kitai mensia.  

Tu utai ti dipadahka Paul ba pengujung surat iya ngagai orang di Rome lebuh iya bejakuka pasal iya ti mai berita manah ngagai orang bansa bukai.  6Tuhan merekatka orang bansa bukai nengah Paul, lalu Paul dibantu bala Kristian ti bukai.  Lalu ba pengujung surat iya, Paul meri puji ngagai Tuhan.  Tang sebedau nya, iya dulu ngingatka sida ti nerima surat iya pasal kebuah iya ngereja semua utai nya: iya nya laban Allah Taala udah “merekat” (milih lalu ngeletakka tanggung pengawa ba iya) awakka nusui berita manah ngagai orang bansa bukai.   Iya mega ngarapka sida ti macha surat iya diberekat lalu dikena Tuhan ngerembaika berita manah.   

Kitai pulai baru ngagai berekat Allah Taala: mayuh kitai ngira berekat tu penguntung ti diulih kitai ke diguna kitai empu - baka pengerai, pengaya enggau pengelantang.  Tang ba Paul berekat Tuhan tu ukai utai ti nguntungka iya empu aja.  7¹Berekat, ba Paul iya nya pengawa ti dikereja iya ke orang bukai.  Lebuh orang bansa bukai nerima berita manah ti dikerembaika iya, nya berekat Tuhan ba Paul. Nama kebuah iya ngumbai nya pengawa ti berekat?  Laban berita manah ti ditusui iya nulung ngubah pengidup orang, lalu mai sida ngelala Tuhan.  Bakani ku nya tau nyadi berekat Paul?  

Tadi maya kitai macha 10 pesan ba pengujung pesan kitai ninga 7²“Anang angkun ka utai orang.  Ingatka jaku Tuhan Jesus: orang ti meri beberkat agi ari orang ti nyambut”.  Nya diambi ari jaku Paul ba Kereja Rasul 20:35.  Ba penemu mensia mayuh, pengawa nulung orang bukai nya ngiruh, ngemasau hari sereta mai pengerugi. Enti kita ngembuan penemu bansa tu, kita enda ngelala berekat Tuhan.

7³Siti agi pekara ti patut ditemu kitai pasal berekat Tuhan iya nya berekat Tuhan datai lebuh kitai bekereja enggau Tuhan.  8Lebuh Paul bejalaika pengawa mission, iya ngatur “strategi” iya enggau manah sereta ngena chara tu mudah.  Iya milih menua ti alai Berita Manah enda kala ditusui.   Iya bejalai  ari siti nengeri ngagai siti nengeri,  ti alai orang begempuru bedagang (commercial centres), baka Antiok di Siria, Antiok di Pisidia, Epesus, Korint enggau Pilipi. Lalu orang dagang ti ninga Injil Kristus mai berita nya ngagai menua sida empu.  Berekat Allah Taala nya ukai utai ti disambut lalu disimpan kitai: iya mesti dikena kitai ngereja pengawa kena ngulihka juluk Allah Taala enggau ke mulia Iya.  

Paul ukai semina ngenataika berekat Tuhan ngena leka jaku.  Lebuh iya mutus deka nemuai ngagai Jerusalem (Kereja Rasul 19:21), iya mansa menua Masedonia enggau Akaia. Dia iya ngumpul pemeri ari kaban Kristian awakka dibai ngagai Jerusalem kena nulung orang Kristian ti suntuk.   

Aku ngasuh kita beratika dua iti pekara bekaul enggau tu.  Kesatu, berekat Tuhan ukai semina diterima kitai dalam leka jaku sampi.  9¹Pengidup ti amat beberekat ukai semina pending ti ninga jaku Tuhan, tang ati ti tebuka lalu ngereja utai nitihka ajar ti udah diterima.  Orang di Masedonia enggau Akaia ngasaika diri beberekat laban udah nerima Injil Kristus.  Lalu lebuh sida ninga berita pasal penusah enggau penyuntuk orang Kristian di Jerusalem, sida lalu tebuka ati deka mantu orang nya ngena duit. Utai ti dipelajarka kitai ari tu iya nya orang ti nemu diri diberekat Tuhan deka merekat orang bukai ngena nama utai ti dikemisi sida.

9²Berekat Tuhan mega enda meruan tetap: enti nuan ngena pemeri Tuhan ke mulia Iya, Tuhan deka nambahka pemeri Iya.  Tang enti nuan enda ngena pemeri Tuhan tauka nuan salah guna enggau pemeri Iya, pemeri nya deka diambi ari nuan.  

9³Berekat Tuhan enda labuh ari serega udah nuan besampi; Tuhan ngena orang bukai ngenataika berekat Iya ngagai nuan.  Ambika chunto, mayuh penemu ti dipekunsika aku enggau kita ukai ari runding aku empu, tang diulih aku ari orang bukai ti sama dikena Tuhan - sekeda nya ari randau ba kedai kopi.  Sida tu, mayuh enda nemu diri nabur berekat Tuhan.  Enti kita ngasai diri teperansang tauka bulih penemu baru udah ke ninga jaku orang, nya berekat Tuhan.  Berekat Tuhan tu nya sebarang utai ti mai ubah enggau pemanah ngagai pengidup kitai - jaku peransang, kaul, pengasih, tauka tulung ti diterima kitai ari orang bukai.   

9⁴Lebuh Tuhan merekatka nuan, Iya bisi tuju ba nuan. Pemansang roh kitai bepanggai ba pemansang bala menyadi kitai ti sama besembiang enggau kitai.  Lalu pemansang gerija bepanggai ba pemansang roh siku-siku kitai.  Lalu lebuh kitai besampi ke gerija kitai, tauka meri pemeri ngagai fund gerija kitai, tauka ngereja barang pengawa ti ulih kereja kitai; kitai nulung ngemansangka gerija.  Aku nemu dalam kitai ti gawa ke Tuhan, kitai tau beserekang penemu enggau pangan diri. Tang anang leju tauka mantul ati: pajakka pengawa ti betul, ti pulaika penguntung semua.  Kuasa pemetang enggau penyai enda ulih ngalahka penampak enggau pemanah Tuhan.  

10Pekara ti kedua iya nya, lebuh Paul deka mansang ngagai Jerusalem, iya nemu enda semua orang deka gaga ati nyambut penatai iya, lebih agi tuai-tuai pengarap bansa Judah.  Sekeda orang ti enda rinduka Paul nyengkaum kaban Kristian ti enda nemu kebuah iya meritaka Injil ngagai bansa bukai.  Nya alai iya minta kaban Kristian di Rome nyukung iya dalam sampi: “Dalam nama Jesus Kristus, enggau ulih pengerindu Roh Kudus, aku minta kita, menyadi, sama bebendar besampi enggau aku ngagai Allah Taala, ke aku empu, ngambika aku dilepaska ari jari orang ke enda arap di menua Judea, sereta ngambika pengawa ti dikereja aku di Jerusalem diterima bala nembiak Tuhan din, ngambika, ulih peneka Allah Taala, aku ulih betemu enggau kita enggau ati ti gaga, lalu ngelantangka diri begulai enggau kita” (Rom. 15: 30-32).

Pengawa ministri dalam gerija ukai semina begunaka orang ti gawa, tang orang ti besampi; awakka pengawa kitai nya ulih diterima semua, lalu kitai dijaga ari sebarang penemu ti nyakal kitai.  Kita ti besampika bishop, paderi kita enggau semua ministri dalam gerija, dikira sama ngereja pengawa Tuhan.   

Ke pengujung iya tu aku mai kitai beratika baka ni Paul bekunsika ministri iya enggau orang bukai.   Enti kitai macha surat Paul sechara ngelansa, kitai tau nyangka Paul tu orang ti berani, ti sedia napi pengelelak, pemerinsa enggau penusah ngereja pengawa mission kediri; lalu enda ngetu nulis surat, meransang orang Kristian ti udah enggau iya betemu.  11Tang ba Rome 16, kita deka tetemuka tusun nama enda kurang ari 34 iku orang tauka raban orang (indu enggau lelaki) ti udah nulung iya nudukka gerija. Paul ngelala pemujur pengawa iya ukai semina bepanggai ba kuasa Tuhan enggau saup Roh Kudus, tang ari sukung orang bukai ti sedia gawa enggau iya. Ministri Paul nya ministri ti enggi semua kaban Kristian ti gawa ke Allah Taala.

12¹Nama utai ti dipelajarka kitai ari tu?   Iya nunjukka kitai berekat Tuhan selalu iya ukai utai ti disangka kitai.   Kita nyangka asa ati ninga berekat Tuhan enda labuh ari serega tengah nuan besembiang. Tadi aku udah ngenangka jaku Paul ba Kereja Rasul 20: 35, ti madahka, 12³“Dalam semua utai nya, aku udah meri kita teladan, ngambika ari kitai ke bebendar bekereja, kita ulih nulung nyukung orang ke lemi, laban kitai ingatka jaku Tuhan Jesus, laban Iya Empu ke nyebut, ‘Beberekat agi orang ke meri, ari orang ke nerima.’”  

Ba orang ti enda ngelala Tuhan, meri nya pengerugi.  Mayuh kitai nyangka utai ti dikumbai berekat nya untung ti diulih kitai; baka pengaya, pemanah pengerai, penyamai enggau pengelantang ati. Tang mayuh orang ti dipeda kitai kaya, bepengerai, tauka lantang ati enda semesti iya arapka Tuhan.  Nya alai berekat Tuhan nya ukai naka utai ti diterima nuan, tang bakani nuan ngena iya ke mulia Tuhan.  

13Gerija tu komuniti ti dikena Tuhan naburka berekat Iya.  Lalu pemujur pengawa Tuhan bepanggai ba naka ni kitai ti nyadi kaban besedia ngereja tanggung pengawa diri - meri hari, besampika gerija, enggau meri sukung ngena mata duit. Lebuh kaban gerija nemu nulung, nyukung sereta meri, gerija nya deka beberekat.  Lalu lebuh gerija kitai diberekat, kitai ti nyadi kaban mega sama nerima berekat.  Baka ni gamal berekat nya?  Iya ubah ti nyadi dalam pengidup nuan - nuan nyadi orang ti penyabar; nemu kasihka orang; nemu nagang diri; nelap ati enggau orang; lalu orang deka begiga enggau betanyaka penemu ari nuan.  14Nuan deka nyadi garam ti meri pemasin, enggau lampu ti mai penampak (Matthew 5: 3-16) ngagai orang ti diau begulai enggau nuan.  Nya kebuah Paul dalam penusah, pengelelak enggau pemerinsa ti diasai iya ulih ngujungka surat iya ba 15Rome 16: 27 munyi tu: “Ngagai Allah Taala ti siku aja, ke nemu semua utai, beri meh mulia belama-lama iya, ulih Jesus Kristus!  Amin.

Nya alai, enti nuan ulih nyebut tu udah tembu semua pengawa lemai hari, “Terima kasih Tuhan ke utai ti udah digaga enggau diberi Nuan”, nuan udah ngelala berekat Tuhan.

~Can. James Juhari~