Krismas tu pasal Jesus Kristus - Canon James Juhari

 

Jaku Ajar Hari Krismas (25/12/2023)

Bacha:

Penyanggup Lama: Isaiah 52:7-10

Epistola: Hebrew 1:1-4

Injil: John 1:1-14

Jaku Ajar

Pagi kemari aku bejakuka pasal berekat Tuhan, lalu demalam aku bejakuka bakani berekat Tuhan ngubah pengidup pengibun bedus, enggau bakani berekat Tuhan tau ngubah pengidup kitai mega.  Aku mega bejakuka kitai ti nyadi garam enggau penampak ngagai ruang bilik, komuniti, enggau bala pangan kitai. Kitai deka tetemuka pengidup ti beberekat nya ukai ngulih enggau besimpanka pengaya ke diri empu aja, tauka ngena orang bukai ke penguntung kitai empu. Pengidup ti beberekat nya meri enggau magi pemisi kitai enggau orang ti suntuk ari kitai; lalu meri diri mela orang bukai.  Penemu orang pasal kitai enggau penemu kitai pasal orang bukai mega deka berubah manah.

Pekara ti deka dikunsika aku enggau kita pagi tu kurang-lebih nampung utai ti disebut aku demalam, tang aku deka ngena bacha ari Sempekat Lama.  Nuan tau ngintu Hari Krismas enggau nama chara nuan, tang nuan enda ulih ninggalka Jesus, laban Hari Krismas nya hari dikena ngingatka pengada Iya.

Amat, kitai tau ngira Krismas tu awak endur kitai meri present ngenai orang ti dikerindu kitai.  Tang kitai mega meri present maya hari pengada tauka maya orang nikah.  Utai ti ngasuh Hari Krismas tu lain ari hari bukai, iya nya laban Allah Taala sehari tu meri utai ti dipeguna kitai maya kitai amat begunaka iya.   Hari Krismas nya pasal bakani Allah Taala negu pengidup mensia ti nadai utai dikembuan, lalu ngasuh pengidup nya bisi guna enggau tuju.  

Bacha Sempekat Lama ti didinga kitai malam tu ditulis lebih 2,500 taun udah.  Nya tau dikumbai kitai pesan Hari Krismas ti dikirum Tuhan ngagai bansa Israel ti dipindah ngagai menua Babilon enggau sida ti tinggal di Jerusalem 2,500 taun suba.  

Dua bengkah raban nya idup merinsa (sida ti dibai ngagai Babilon idup baka ulun di menua orang, lalu sida ti tinggal diau ba nengeri ti udah nyadi tembawai).  Sida nadai agi rumah sembiang alai ngenjukka piring, laban rumah sembiang ti digaga Raja Solomon udah dirusak sedadu Babilon.  Ari bansa ti tebiilang nama, sida udah nyadi bansa ti nadai utai dikemisi sereta enda dipebasaka orang bansa bukai.

Nama ti ngasuh sida nyadi merinsa baka tu?  Laban sida udah arapka raja sereta temegahka utai ti udah dikereja sida.  Bansa Israel, ba pun sejarah sida, nadai raja. Sida betuaika semina Allah Taala aja.   Tang sida dekaka diri sama sebaka enggau menua bukai ti dikuasa raja (1 Samuel 8: 6-9).  Tang Allah Taala merika sida jaku tangkan madahka enti sida dikuasa raja, pengidup sida mega deka merinsa baka pengidup rayat ti diau dalam menua ti dipegai raja.  Jaku Tuhan amat nyadi: berapa taun udah Israel dipegai raja, raja sida belabuh ngereja utai ti salah.  Sida belabuh nyembah petara bukai, ngulihka pengaya ke diriempu, berebut kuasa, lalu ngujungka sida nekan rayat ti dipegai sida.  Pengujung iya, menua nya lalu bepechah dua - Israel di utara enggau Judah di selatan.  Laban menua nya bepechah dua lalu beperang sama diri, munsuh mudah nyerang lalu ngerusak menua nya.  Bala rayat ti diau dia ditabanka ngagai Babilon.    

Nama penyadi semaya ti udah digaga Tuhan enggau Abraham, Isak enggau Jakob kelia: abis naka nya aja?  “Enda!” ku Isaiah, “Tu ukai pengujung iya laban Allah Taala tetap ngemeranka semaya; lalu Iya dia bisi berita manah deka dibai ngagai bansa ti nadai agi utai diadang enggau dikarap”  Ku iya: ⁷Naka meh pengerindu meda siku seruan ke datai ngelangkah bukit, mai berita ti manah, berita pasal pemaik! Iya madahka pasal pemenang, lalu nyebut ngagai Sion, “Allah Taala nuan endang Raja!”   

Ku Isaiah, “Aku bisi berita manah ngagai kita ti tinggal di Jerusalem - Perintah Babilon udah tumbang.   Aku mega mai ngagai kita jaku semaya Tuhan ti baru: Iya udah besemaya deka ngidup kitai baru, lalu ngangkatka bansa kita; kaban belayan kita ti ditaban ke Babilon deka pulai ngagai menua Israel baru; ti alai sida enggau kita deka diau dalam pemaik enggau pengelantang baru”.  

Jaku Tuhan ti ditusui ba gerija maya Krismas ukai “Merry Christmas” tang bekaul enggau utai ti bendar ti nuntung pengidup mensia.  Aku enda nemu nama utai ti nuntung pengidup kita siku-siku; tang bisi ari kitai ti datai besembiang kurang-lebih baka bansa Israel ti nganti Tuhan datai nyelamat sida.  Sekeda kitai ditinggang penusah ari penyalah tauka pemeli kitai empu; tang kitai mega tau tusah ketegal pengawa orang bukai.

Tang penusah ti pemadu berat nuntung pengidup kitai Kristian, iya nya lebuh kitai putus kaul enggau Tuhan.  Lebuh kitai putus kaul enggau Tuhan, kitai mega putus kaul enggau orang bukai ti sama pengarap.  Kitai nadai penyamai ati enggau pangan diri; kita nyadi siga laban enda nyamai ati pasal utai ti udah nyadi antara kitai.  Tiap kali kitai putus kaul enggau Tuhan, kitai nadai penyamai, nadai selamat enggau nadai berekat.  

Hari Krismas nya hari endur mensia berami gaga, tang mayuh orang maya tu berasai seilu-ilu tauka sinu berundingka diriempu.  Nama kebuah?  Laban selamat Tuhan nadai dalam pengidup sida. Lebuh kitai kelalu bepanggai ba utai dunya enggau kaul mensia, lalu ngarapka utai nya deka merika kitai pengaga enggau penyamai, kitai deka asa ati.  Amat, kitai begunaka utai kena kitai beridup enggau mensia nyadika pangan kitai; tang utai dunya enggau ati mensia enda tetap: sehari tu bisi, pegila tau nadai; sehari tu manah, pegila tau jai. Laban iya enda tetap, nya alai iya enda ulih nganti kaul kitai enggau Tuhan.    

Musin Krismas tu nuan deka meda gerija penuh laban mensia.  Nama kebuah?  Laban ati mensia lelengau deka ninga sereta nerima jaku pesan Tuhan.  Amat, maya tu nuan nyangka meri enggau nerima present ari bala pangan, nyambut mayuh bala pengabang ke rumah nuan; tang tu semina meri pengaga ti sementara aja.  Iya enda merika nuan pengelantang enggau selamat ti meruan, laban utai ti meruan ukai datai ari utai dunya tu.  Utai ti meruan bekaul enggau semengat enggau roh nuan, lalu nya semina ulih diisi selamat (shalom) Allah Taala.  Iya semina datai ari kaul nuan enggau Tuhan Jesus.

Lebuh Israel ngaga pemutus deka merintah diri ngena kuasa raja, Tuhan neju sida ngereja nama utai ti dikedeka sida. Allah Taala mega enda nagang sida enti sida deka nyembah petara bukai.  Tang udah sida dituntung penusah, sida ngangau minta tulung Tuhan; Iya datai nyaup sida.  Baka nya mega Tuhan enggau kitai.  Enti kitai deka ninggalka Tuhan, Iya sinu ati tang enda nagang kitai ngereja nama utai ti deka digaga kitai.   Tang enti kitai ngesal lalu deka pulai baru, Iya nyambut kitai baru.  

Tang lebuh Tuhan datai nulung kitai, Iya enda nitihka atur kitai.  Iya nitihka atur Iya empu, nitihka maya Iya empu, enggau chara Iya empu.  Lebuh Tuhan datai nyambut bala nembiak Iya, Iya deka datai baka melikat ti betemu enggau sida pengidun bedus. Tang pagi tu kitai nadai ninga melikat bejaku; Bup Kudus mai berita manah ti diguna kitai jam tu: iya nya pengadang ati (hope); pengerindu (love), pemaik (peace), enggau pengaga (joy) ti betumbuh ari kaul kitai enggau Tuhan Jesus.  

Hari Krismas iya nya pasal orang ti sedarka diriempu orang ti suntuk (ti nemu diri nadai pemanah).  Orang ti bansa tu deka nerima pemeri ti pemadu besai ari Tuhan - pengampun enggau pengelepas ari dosa.  Nya utai ti disebut Isaiah ba ayat 10: “TUHAN deka ngena kuasa Iya ti kudus. Iya deka ngelepaska bala nembiak Iya,lalu semua dunya deka meda nya.”   Nama utai ti nanchang tauka nekul pengidup nuan diatu?  Nama utai ti selalu ngasuh nuan enda nyamai tauka irau ati?

 Maya Krismas tu ukai semina maya nuan berami makai-ngirup enggau kaban belayan enggau pangan nuan, tauka endur nuan ngelantangka ati diri.  Krismas nadai reti enti udah abis pengerami nuan belabuh irau tauka tusah ati baru.   Pagi Krismas tu Tuhan meri pesan minta nuan ngelepaska semua ma berat ti disan nuan ba jari Iya; minta ampun Iya ba senentang ni nuan udah salah; lalu pinta ari Roh Kudus pemaik dalam ati, pengadang ati, pengaga, enggau pengerindu.   

Kati ku nuan ngemeranka utai tu?  Ingat nama utai ti disebut aku pasal berekat Tuhan.  Nuan diberekat Tuhan awakka nuan tau dikena Iya merekat orang bukai.  Enti nuan udah ngasaika pemaik Tuhan, diau bebaik enggau orang bukai.  Enti nuan udah nerima pengerindu Tuhan, badu agi ngaga penyarut tauka ngelaya orang kulu-kili.  Enti nuan deka meruan idup dalam pengaga, ayanka pengasih ngagai orang ti suntuk, tulung sida ngena nama utai ti dikemisi nuan.  Lebuh nuan ngereja tu, pengidup nuan beberekat; lalu Allah Taala deka meruan dikemesai sereta dipuji.  

~Can. James Juhari~