Nyembah enggau ati ti baruh, sereta enggau chara ti mudah, lalu bejakuka pasal Jesus Kristus ti nyadi Juruselamat - Jaku Ajar Canon James Juhari

 

Jaku ajar Malam Krismas (24/12/2023)

Bacha: 

Penyanggup Lama: Isaiah 9:2-7

Epistola: Titus 2:11-14

Injil: Luke 2:1-20

Jaku Ajar

Jaku ajar aku malam tu nyambung utai ti udah disebut aku pagi tadi, lebuh aku bejakuka pasal berekat Tuhan.  *Malam tu aku deka bejakuka pasal seraban orang ti enda ngadang diri tau bulih berekat Tuhan ti ngujungka pengidup sida diubah belama-iya.  Sida tu nya bala pengibun bedus ti meda enggau ninga melikat ti nusui ngagai sida pasal pengada Tuhan Jesus.  *Utai ti narit ati kitai pasal cherita tu iya nya, jeman bup kudus kelia, pengibun bedus tu orang ti pemadu baruh ari semua raban orang ti dikira baruh pangkat.  *Tang sida dipilih nyadi orang ti terubah iya nyembah sereta nusui pasal Jesus Kristus dalam sejarah pengarap Kristian.  Nya alai aku mai kitai bejalar ari sida tu malam tu baka ni kitai tau nyembah enggau ati baruh, sereta enggau chara ti mudah, lalu bejakuka pasal Jesus ti udah datai ke dunya nyadi Juruselamat mensia.

*Amat ke enda tu utai ti nyadi dalam gerija kitai diatu? Amat ke enda orang Kristian datai ke gerija ukai ketegal tuju bukai tang laban deka nyembah Allah Taala?   Kebuah ti bendar orang datai ke gerija, ukai deka nyembah Allah Taala, tang deka minta berekat Tuhan - berekat pengaya, pengerai, enggau pengelantang idup.  *Taja pengawa nyembah nya, iya ti bendar, meri ngagai Tuhan; tang mayuh orang ngumbai pengawa ti nyembah tu minta utai ari Tuhan.  *Aku bedau kala ninga orang madahka diri ke gerija nadai kebuah bukai, tang laban deka nyembah Tuhan.  Tang aku suah ninga orang bejaku madahka diri ke gerija laban deka besembiang; reti nya deka minta utai ari Tuhan.  *Tauka sida ke gerija deka meri terima kasih ngagai Tuhan ketegal utai manah ti udah diterima sida.  *Aku ukai madah semua ti datai ke gerija semina deka minta utai ari Tuhan, tang mayuh kitai datai ke gerija semina laban kitai bisi utai dipinta. *Reti nya, mayuh kitai datai ke gerija ukai ketegal pengerindu kitai ke Tuhan tang ketegal pengerindu kitai ke kitai empu: laban kitai bisi utai diguna enggau dipinta.   

Penanggul iya, lebuh kaul kitai enggau Tuhan semina naka nya aja, kaul kitai enggau Tuhan mabu.  *Kitai nadai penemu dalam tauka “confidence” bejakuka pasal Jesus enggau orang bukai.  *Nya kebuah kitai takut bejakuka pasal pengarap diri, laban malu dipeda orang enda ngelala sapa Jesus. 

Aku ukai bejakuka sapa-sapa ditu, tang semina bekenangka penalam tauka pemabu pengarap kitai lebuh kitai datai ngadap Tuhan.  *Semua kitai mesti ngaku pengurang diri ba pekara tu: kitai semua jauh ari mulia Tuhan.  *Enti kitai sakit, kitai mesti ngaku diri sakit enti kitai deka digerai.  Bakanya mega, kitai mesti ngaku pengurang diri, enti kitai deka ngubah pengidup diri.  *Lalu kitai mesti ngaku dosa diri, enti kitai deka nerima pengampun ari Tuhan.   *Allah Taala deka ngampun dosa kitai, ngubah pengidup kitai, merekatka kitai, lalu mai kitai pulai baru ngagai Iya, enti kitai ngadap Iya enggau ati bendar.

Bacha Injil kitai malam tu mega madahka pasal Tuhan ti nemu sereta bekuasa atas semua utai. *Ba mata raban bansa, pengibun bedus nya ukai orang ti dipebasa tauka dikarap, laban pengawa sida nagang sida nyadi orang ti dikumbai tuchi ba mata pengarap. *Nambahka nya, sida pengibun bedus tu tebilang bendar ngambu lalu ngenchuri bedus orang bukai ti bebalut ngulam rumput enggau bedus sida.  Laban sida balat bendar bula, nya alai sida enda ulih diterima nyadi saksi maya pechara ba kot.  

Tang Tuhan ngayanka Diri ngagai bala pengibun bedus tu, lalu milih sida nyadi raban orang ti terubah iya nusui berita pasal Tuhan Jesus.  *Utai ku aku baka tu: enti Allah Taala ulih ngena pengibun bedus ke basa enggau mulia Iya, Iya ulih ngena sebarang kitai ti ditu.  *Udah sida meda Jesus gali ba dulang jelu, sida mulaika diri; lalu ba rantu jalai pulai, sida nusui utai ti udah nyadi ngagai sapa-sapa orang ti enggau sida betemu.

*Cherita pasal pengibun bedus ti betemu enggau melikat ngajar kitai pasal Allah Taala ti bisi juluk ba kitai. Sekeda kita datai ke gerija laban malam tu Malam Krismas, lalu kitai ngasaika diri mesti nurun ke gerija.  *Tang utai ti enda ditemu kitai, iya nya Tuhan bisi perambu Iya empu ba kitai.  *Aku ngaku lebuh aku nyendiaka jaku ajar tu, aku besampi ngagai Tuhan minta Iya ngangau orang ti dipilih Iya datai ke gerija malam tu, awak Iya mereka lalu milih orang nya ke basa enggau mulia Iya. 

Nuan tau madahka diri ukai dikangau Tuhan laban enda patut patut Iya ngangau nuan maya tu hari. *Tang Tuhan bekereja dalam pengidup kitai maya kitai enda ngadang.  Ingat, nama penyadi Paul lebuh iya mansang ngagai Damaskus deka nangkap sebarang orang Kristian ti ditemu iya?  Iya empu kena “tangkap” Jesus lalu diasuh nyadi rasul.

*Enti nuan datai ke gerija malam tu minta berekat Tuhan, aku besampi minta Tuhan merika nuan nama utai ti dipinta nuan ari Iya; sekalika nya nuan minta digeraika ari penyakit; minta kaul nuan enggau orang bukai diadu manahka agi; tauka minta Tuhan meri penetap tauka penegap ngagai pengidup nuan.   Enti nuan ke gerija laban nuan deka besampika orang ti dikerinduka nuan, aku mega minta Tuhan merika utai ti dipinta nuan ke orang nya.  *Enti nuan datai ke gerija minta pengampun dosa, aku minta Tuhan ngampun nuan awakka nuan pulai ke rumah enggau ati lantang malam tu.    Enti nuan enda nemu nama kebuah nuan datai ke gerija, tauka laban nuan kena bai orang datai kitu, aku besampi minta Tuhan ngayanka ngagai nuan nama peneka enggau juluk Iya ba nuan.  *Tauka, enti bisi sekeda ari kitai ti datai ke gerija tiap minggu, tang agi enda meretika nama reti pengidup Kristian ti bendar, aku besampi minta Tuhan ngayanka peneka Iya ba kita.  

Lebuh kitai bejakuka pasal Allah Taala, nadai utai tau nyadi enti nya nadai kebuah.  *Aku endang enda patut bediri ditu bejaku ngagai bala kita malam tu, laban nitihka perambu asal aku, aku endang patut ba Gerija St. Peter, Saratok datai ngagai ujung taun tu.  *Tang Tuhan bisi tuju ke bukai.  Tuhan bisi tuju ba kitai semua, nyengkaum sida ti nadai agi tuju dalam pengidup.  *Bala pengibun bedus tadi tau ngaku diri nadai agi guna ba mata orang mayuh.  Lebuh sida meda melikat Tuhan ngayanka diri malam nya, sida tau nyimpan rasia nya kediri, laban orang endang enda arapka jaku sida.  Tang iya enda baka nya.  Bup Kudus madahka “lebuh bala melikat nya udah ninggalka sida lalu pulai ke serega, sida pengibun bedus nya lalu bejaku enggau pangan diri, “Aram kitai mupuk ngagai Betlehem, ngambika kitai meda utai ti udah nyadi, ti udah dipadahka Tuhan ngagai kitai.”

Enti nuan datai ke gerija malam tu, enda ngira nama kebuah nuan datai; sekalika nya minta berekat Tuhan, minta pengerai, minta pengampun, tauka semina deka meda pengawa orang; titihka nama ti dikereja pengibun bedus tadi.  *Giga nama utai ti dipadahka Tuhan ngagai nuan malam tu.  Nama kaul utai ti didinga nuan malam tu enggau utai ti nyadi dalam pengidup nuan?   *Berandau enggau paderi kitai kini, tauka pangan ti rapat enggau nuan, diri sebilik, tauka nuan bejaku enggau Tuhan empu maya nuan besembiang kediri.  Tanya nama utai ti dikedeka Tuhan ari nuan ngelama tu.  

Cherita pasal pengibun bedus madahka kitai enda ulih nyembah Tuhan enti kitai enda mela tauka gawaka Tuhan.  *Sebedau jaku nya ngenakutka kita, awakka aku nerangka iya dulu.  *Mela tauka gawaka Kristus ukai reti iya gawa ba gerija tauka ngereja pengawa gerija.  *Mela Kristus reti nya mela Iya ba sebarang endur nuan gawa tauka diau.  *Iya nyengkaum ngereja pengawa ti berat, tauka gawa begulai enggau orang ti tusah enggau gawa, tauka orang ti enda rinduka nuan.   Iya nyengkaum diau begulai enggau orang ti ngembuan penemu tauka pengarap ti lain ari enggi nuan.  *Lalu lebuh nuan ngadap Tuhan minta Iya nyaup nuan ngereja pengawa ti berat, Tuhan enda semesti iya ngasuh iya nyadi mudah: Iya tau merika nuan penemu enggau pengering ngereja pengawa ti berat nya.  *Lebuh nuan minta tulung Tuhan mutarka kaul nuan enggau orang ti tusah enggau begulai, Tuhan enda semesti iya ngambi orang nya ari pengidup nuan: Iya tau merika nuan penyabar, pengampun enggau pengerindu.  Enti nuan minta digeraika ari penyakit, Tuhan enda semesti iya meri pengerai; tang Iya tau merika nuan pengaga enggau selamat dalam pengidup dalam nuan ti napi pemedis. *Enti nuan suntuk diatu, Tuhan enda semesti ngasuh nuan nyadi kaya: Iya tau ngasuh orang bukai nulung nuan tauka merika nuan penemu dikena ngidupka diri.  

*Bala pengibun bedus nya enda ngadangka pengidup sida deka berubah udah sida pulai ngabas Jesus di Bethlehem: tang kitai diatu, lebih 2000 taun udah, agi bejakuka pasal sida nya malam tu.   Ari raban orang ti dikira nadai guna ba mata orang mayuh, sida ninggalka Bethlehem nyadi pemberita Injil ti terubah iya dalam sejarah Eklesia. *Ayat 17 enggau 18 nyebut, “¹⁷ Lebuh sida meda nya, sida lalu madahka utai ti udah dipadahka melikat pasal anak mit nya, ¹⁸lalu semua orang ke ninga nya balat alit ati ke utai ti dipadahka sida pengibun bedus”.  *Sida ninggalka “legasi” ti meruan.

Malam tu, lebuh kita ningaka aku ti madahka pasal Allah Taala ti besedia merekatka pengidup kita; aku ngasuh kitai mansikka pengamat nya: giga nama berekat ti udah disediaka Tuhan ke kita.  *(Pagi tadi, aku udah nerangka nama utai ti dikumbai berekat Tuhan; lalu enti kita nadai ba gerija pagi tadi, kita tau minta skrip ari Fr. Walter.  Utai ti beguna nya tu: *udah nuan nerima berekat Tuhan, nama guna nuan enggau berekat nya?  Sida pengibun bedus tadi ninggalka legasi ti meruan. 

Nama legasi nuan ti deka dikingatka orang, udah nuan ninggalka dunya tu ila?   *Orang mayuh enda arapka pengibun bedus laban sida besedia bula laban deka ngenchuri bedus ti enggi orang bukai.  *Sida udah idup baka orang ti enda beradat, nguji ngulihka penguntung ke diri empu aja.  

Tang lebuh sida betemu enggau Jesus ti gali ba dulang jelu, pengidup sida berubah.  *Tekala nya sida nemu bejakuka pasal utai ti bendar ti ngalitka ati semua orang ti ninga.  *Kitai tu ukai pengibun bedus, tang enti kitai nadai udah bejaku bendar pasal pengarap diri, kitai sebaka enggau sida; *enti kitai nadai udah ngayanka pengidup Kristian ti bendar ngagai pangan kitai, ngagai diri sebilik, ngagai orang ti diau tauka gawa enggau kitai. 

Pengidup kitai nadai bida ari orang ti nadai pengarap enti kitai sama ngigaka pengaya ke diriempu aja, lalu sama ngiraka pengelantang diriempu aja.  *Kitai baka orang ti nadai pengarap; sembah enggau sembiang nadai batang guna ba kitai.  *Perangai ti diayanka kitai ngagai Tuhan sama baka orang ti nadai pengarap.

Tuhan endang patut ringatka kitai laban kitai selalu bekiraka diriempu aja.  Tang malam tu, *Tuhan nganjung melikat Iya bejaku ngagai ati kitai siku-siku, baka Iya ti udah bejaku nengah melikat ngagai bala pengibun bedus, “Anang takut!  Laban aku mai ngagai kita Berita Manah ti ngasuh ati semua mensia gaga: ¹¹sehari tu, di nengeri David, Juruselamat kita udah ada, iya nya Kristus!  ¹² Tu tanda ti diberi ngagai kita: kita deka nemu siku anak mit dibedung ngena kain, gali dalam dulang.”

Nuan enda tetemuka Jesus gali dalam dulang malam tu, *tang Roh Kudus nunjukka Jesus ti bisi dalam ati nuan, ti lama udah enda dikingat enggau diibuhka nuan ngelama tu.  *Iya deka ngubah pengidup nuan, baka pengibun bedus ti diubah ari orang ti enda dikarapka orang mayuh, nyadi “penginjil” ti terubah dalam sejarah gerija.   Nuan deka nyadi garam enggau penampak, enda semesti iya ngagai dunya; tang ngagai ruang bilik nuan, komuniti nuan, enggau bala pangan nuan.  *Nuan deka ngelala nama reti ngembuan pengidup ti beberekat.  *Nuan nyangka enda nyadi orang alim, tang nuan ngelala nama utai ti agi kurang dalam pengidup nuan.

Nuan deka tetemuka pengidup ti beberekat nya ukai ngulih enggau besimpanka pengaya ke diri nuan empu aja, tauka ngena orang bukai ke penguntung nuan empu.  *Pengidup ti beberekat nya meri enggau magi pemisi nuan enggau orang ti suntuk ari nuan; lalu meri diri mela orang bukai.  *Orang bukai deka alit ati ke ubah dalam pengidup nuan; ninga jaku ti pansut ari mulut nuan enggau meda pemanah pengawa ti dikereja nuan.  Lalu penemu nuan pasal orang bukai mega deka berubah.

Peda nama utai ti nyadi ba pengidup pengibun bedus tadi.  *Sida “pulai, ngemuliaka sereta muji Allah Taala ketegal semua utai ti udah didinga enggau dipeda sida, munyi ti udah dipadahka ngagai sida”.  *Aku arap sereta besampika pengamat ti nyadi ba sida pengibun bedus deka nyadi dalam pengidup tiap iku kitai lebuh kitai pansut ari gerija tu malam tu. *Besampi kitai

 

~Can. James Juhari~