Penaluk Josep (Jaku Ajar ari Canon James Juhari)

Jaku Ajar Hari Minggu Ke-terubah (31 Disember 2023)

Bacha:

Penyanggup Lama: Isaiah 61:10-62:3

Penyanggup Baru: 1 Korint 1:26-29

Injil: Matthew 2:13-18

Jaku ajar

2Enti kitai beratika jaku ajar aku berengkah ari pagi Hari Minggu tu tadi, ngagai malam Krismas enggau pagi Krismas, utai ti disebut aku nadai tentu ba Tuhan Jesus. Pagi Advent 4 aku tebal agi bejakuka pasal Paul; malam Krismas aku bejakuka pasal pengibun bedus; lalu pagi Krismas aku bejakuka pasal jaku nabi Isaiah ngagai orang Israel ti tinggal di Jerusalem. Pagi tu kitai ninga cherita pasal anak mit di Bethlehem ti dibunuh raja Herod. Aku ukai deka bekajuka raja Herod, tang pasal deka bejakuka pasal Josep nitihka cherita ti ditusuika ba Injil Matthew 2:13-18.

3Terubah iya tu aku mai kitai beratika Matthew 2:13-15, pasal cherita Josep ti mai Maria enggau Jesus lari ngagai menua Ejip. Udah Orang Maji mupuk ari endur nya, melikat Tuhan pegari dalam mimpi Josep. Ku melikat nya bejaku enggau iya: “Angkat nuan. Bai anak mit nya enggau indai Iya rari ngagai menua Ejip. Diau dia nyentuk ngagai maya aku ngasuh nuan ninggalka menua nya, laban Herod baru deka ngiga anak mit nya, lalu munuh Iya.” Ba ayat 14-15 kitai macha: Josep lalu angkat, mai anak mit nya enggau indai Iya malam nya, lalu mupuk ngagai menua Ejip. Sida diau di menua nya nyentuk ngagai maya pemati Herod. Tu ngamatka jaku ti udah disebut Tuhan beseruanka siku nabi, “Aku ngangauka Anak Aku pansut ari menua Ejip.”

Enti kita macha Sempekat Lama, kita deka ngelala pemesai reti enggau guna menua Ejip dalam perambu Tuhan. Nya menua ti alai bansa Israel udah nyadi ulun. Nya mega menua ti endur sida ngenduhka diri lalu diselamatka ari penusah kemarau enggau lapar pungkang. 4Ba Bup Pemungkal 46: 3-4 kitai ningaka Tuhan bejaku enggau Jakob dalam genera, ngasuh iya nitihka Josep ngagai menua Ejip: “Aku tu Allah Taala, ke disembah apai nuan. Anang takut mansang ngagai menua Ejip, laban Aku deka ngaga peturun nuan nyadi bansa ti kering di menua nya. Aku deka bejalai enggau nuan ngagai menua Ejip, lalu Aku deka mai peturun nuan pulai baru ngagai menua tu…”

Sekali tu menua Ejip nyadika endur alai Joseph, Maria enggau Jesus nyelamatka nyawa diri ari Raja Herod. Penyauh antara Bethlehem ngagai antara menua Ejip enggau Israel kira 80 batu. Kitai tau belabaka sida tiga bejalai 250 batu agi nuju nengeri Alexandria ti diwan lebih sejuta iku raban bansa Israel lebuh maya nya kelia. Pengelama sida bejalai ari Bethlehem ngagai Alexandria enda kurang ari dua minggu.

5Pekara ti kedua ti deka dibai aku peratika kita nya pasal utai ti nyadi di Bethlehem (ayat 16-18): “Lebuh Herod nemu diri udah ditipu orang ke pandai pasal bintang nya, iya pedis ati. Iya lalu meri atur ngasuh semua anak mit ke lelaki, ke umur dua taun ke baruh, di Betlehem enggau di menua ti ngelingi nengeri nya, dibunuh magang, nitihka maya ti udah ditemu iya ari orang ke pandai pasal bintang nya. Nya meh jalai jaku Tuhan ti disebut nabi Jeremiah dikamatka: “Munyi nyawa bisi didinga di Ramah, munyi orang ke bekeduie nyabak. Rachel nyabakka bala anak iya. Iya enggai diperindang, laban sida nadai agi (Jer. 31.5).”

6Herod ada dalam ruang-bilik orang ti bepangkat besai. Apai iya empu raja. Lebuh Herod beumur baru 25 taun iya dichiri nyadi governor menua Galili. Dalam taun 40 B.C. Senate perintah Rome meri iya gelar, “Raja orang Judah”. Nya kebuah iya irau ati udah iya ninga orang Maji nanya pasal pengada “Raja orang Judah”.

Udah apai Herod mati kena rachun orang, iya lalu belabuh irauka diriempu, takutka kena bunuh orang. Udah iya nyadi raja, Herod merintah menua enggau terit; sapa-sapa orang ti disangka iya bisi ati deka ngelaban iya dibunuh iya magang. Lalu orang ti kena bunuh iya maya iya ti nyadi raja nyengkaum ipar lelaki iya empu, mentua indu iya, dua iku anak lelaki iya, enggau bini iya empu.

Nya alai lebuh iya nemu diri udah kena tipu orang Maji iya ringat lalu ngasuh bala sedadu iya munuh semua anak mit ti lelaki beumur 2 taun ke baruh. Nengeri Bethlehem enda besai, diwan kira seribu iku orang jeman nya kelia; reti nya antara 20 enggau 30 anak mit ti beumur baruh ari 2 taun kena bunuh sedadu Herod. Ramah, ti disebut nabi Jeremiah nya genturung pendiau di utara Israel, kira 5 batu penyauh ari Jerusalem enggau 10 batu ari Bethlehem. Rachel, bini Jakob dikubur di Bethlehem. Iya disebut Matthew ditu laban penyinu bala indai ke anak sida ti kena bunuh sedadu Raja Herod, nya penyinu ti diasai mensia ari kelia menya datai ke diatu, lebuh mensia ngereja penyai ba pengidup orang ti nadai bepenyalah.

Kitai nadai macha pasal pemulai Josep, Maria enggau Jesus ngagai Nasaret pagi tu. 7Tang enti kitai macha Matthew 2: 19-23, dia kitai ninga, udah raja Herod mati, melikat ngayanka diri ngagai Josep baru. Ku iya, “Angkat. Bai anak mit nya enggau indai Iya, lalu pulai ngagai menua Israel, laban orang ke deka munuh Iya, udah mati.” Josep lalu angkat, mai anak mit nya enggau indai Iya, lalu pulai ngagai menua Israel. Tang lebuh Josep ninga Arkelaus udah nganti apai iya Herod nyadi raja menua Judea, iya takut mansang ngagai menua nya, lalu lebuh iya udah diberi jaku tangkan dalam mimpi, iya lalu mupuk ngagai pelilih menua Galili, Iya lalu diau ba sebuah nengeri ti dikumbai Nasaret. Kebuah Joseph pindah ngagai Nasaret di Galili laban Arkaeleus ti nganti apai iya Herod nyadi raja, lebih agi jai ari apai iya. Lalu Galili tu ba utara, enda kena pegai raja Archaeleus. Lalu tu ku Matthew baru, “Tu ngamatka jaku ti udah disebut Tuhan beseruanka sida nabi: “Iya deka dikumbai Orang Nasaret.”

8Nama utai ti tau dipelajarka kitai ari cherita tu? Bisi 3 iti pekara.

Kesatu, iya ngajar kitai bakani kitai napi utai ti nyadi dalam pengidup kitai. Aku enda nemu sekalika kitai kala beratika Josep, siku orang ti tebilang bendar dalam Sempekat Baru, tang kitai nadai macha seleka jaku ti pansut ari mulut iya. Kitai semina dipadahka Josep ngasika semua pesan ti dipadahka melikat ngagai iya. Ba Matthew 1: 24 lebuh melikat ngasuh iya ngambi Maria nyadika bini iya, Bup Kudus madah ka, “Lebuh Josep dani, iya lalu nitihka jaku melikat Tuhan. Iya jadi enggau Maria”. Tadi kitai ninga lebuh iya betemu enggau melikat dalam mimpi ngasuh iya mai Maria enggau Jesus, lari ke menua Ejip, iya enda nganti hari siang: iya mai seduai angkat malam nya. Udah iya diasuh pulai ngagai Israel baru, iya nitihka jaku melikat tekala nya. Datai iya di Bethlehem, iya bemimpi baru, ti alai melikat ngasuh iya pindah ngagai Galili, iya nadai sangkal. Iya pindah ke Nasaret tekala nya.

Josep nadai minta Tuhan merika iya jalai bukai; iya enda besangkal madahka perambu Tuhan nya ngiruh, tauka betangguh nganti iya bisi hari ila. Josep nadai mayuh jaku: iya angkat lalu mupuk. Hebrew 11:8 nyebut munyi tu pasal Abraham lebuh Tuhan ngasuh iya mupuk: “Ulih pengarap, Abraham ngasi lebuh iya diasuh bejalai ngagai siti endur ti deka diterima iya nyadika pesaka. Iya mupuk, taja pen iya enda nemu tunga pejalai diri.”

Allah Taala ngiga orang ti ngasika jaku Iya. Ku Samuel nganu raja Saul, “Ni bagi utai ti dikedekaka TUHAN? Ngasika Iya, tauka piring? Manah agi ngasika Iya ari ke meri bedus ti pemadu manah nyadika piring” (1 Samuel 15:22). Jesus ba John 13:17, bejaku enggau bala murid iya munyi tu: “Enti kita nemu utai tu, kita bulih berekat enti kita ngereja sida”. Reti nya berekat Tuhan datai ari ati ti ngasika jaku Iya. Enti kitai ngasaika pengidup kitai puang, nadai tuju, nadai utai ulih, utai ti patut ditanya ba diriempu: Kati kitai bisi ke enda kitai ngasi lalu nitihka jaku Tuhan? Tauka kitai agi betangguh?

9Kedua, lebuh Tuhan bekereja kitai tau ngadang bisi utai deka nekul pengawa kitai. Tiap kali kitai bisi perambu, bisi aja orang deka nyakal. Lebuh Tuhan bekereja nengah kitai, Sitan mega bekereja awakka utai nya enda nyadi. Enti nuan bisi perambu ti manah ke taun 2024, aku netapka bisi aja penguji deka datai tauka utai deka nyadi, awakka perambu nuan nya puntan. Josep tetemuka tanggung pengawa nyadi pengibun Kristus, ukai utai ti mudah - tanggung pengawa nya mai mayuh utai ngachau, pengiruh enggau penusah ngagai iya. Tang Josep nerima semua utai nya ketegal Kristus.

Baka nya mega, lebuh kitai nerima Kristus lalu besemaya deka talukka Iya, kitai tau ngadang penusah enggau penanggul deka nuntung pengidup kitai. Nama kebuah iya nyadi baka nya? Lebuh nuan nyadi nembiak Kristus nuan deka bejakuka utai ti bendar sereta ngereja pengawa ti lurus. Tang dunya ti endur kitai diau penuh laban utai ti nulak pemendar enggau pengelurus. Nuan deka betemu enggau orang ti bula enggau ngelakar, enggau sida ti selalu ngereja utai ti enda betul.

  Tu utai ti disebut aku maya aku meri jaku ajar lebuh Malam Krismas. Pengidup ti beberekat ukai pengidup ti nyamai. Pengidup ti beberekat ukai reti iya nuan deka dijaga Tuhan siang-malam awakka penusah enda datai ba pengidup nuan. Josep orang ti dipilih Tuhan, tang iya enda dilepaska penusah, penanggul enggau pengiruh. Nama utai ti dikereja Tuhan ngagai iya? Tuhan nunjukka iya jalai tauka merika iya penemu kena nangkup tauka ngelepaska diri ari penusah ti datai.

Semua kitai rinduka pengidup ti nyamai (comfort zone) ti alai kitai dilindung ari utai ti tau ngemedis. Nya kebuah fokus sampi kitai suah bendar bekaul enggau minta penyamai, tauka minta Tuhan ngiarka semua penusah ti tau nekul juluk ati kitai. Tu bida antara kitai enggau Josep: Joseph nerima nama utai ti nyadi dalam pengidup iya. Nya kebuah iya ulih ngasika jaku Tuhan. Ingat, kitai nadai utai dipelajar enti semua utai ti diguna kitai tau diulih enggau mudah, tauka enti kitai enda kala ngasaika pemedis enggau penanggul dalam pengidup. Aku ukai madahka nuan nyerahka pengidup nuan ngagai nasip tauka nitih jaku Tuhan enggau enda berunding.

Musin Advent tu tadi kitai diingatka ba Pesan Lumur Satu: “Kita deka rinduka Tuhan Petara kita enggau pengabis ati kita, enggau pengabis runding kita, lalu enggau pengabis pengering kita”. Orang ti ngasika Tuhan nya orang ti nguji meretika kini tuju Tuhan mai iya, nama utai ti diasuh Tuhan kereja iya, enggau bakani iya ngereja utai nya. Nya reti rinduka Allah Taala enggau pengabis ati, runding enggau pengering kitai.

Orang ti ngasika Allah Taala mega enda besampi, minta utai ari Tuhan semina ke guna iya empu aja. Orang ti ngasika Allah Taala selalu dulu betanya ngagai Iya. “Tuhan nama utai ti diasuh Nuan kereja aku; kini ke Nuan ngiring aku?” Tuhan enda semesti iya bejaku enggau nuan dalam mimpi, baka Iya ti bejaku enggau Josep. Tang Tuhan tau nunjukka ngagai nuan tanda tauka meri peluang (opportunity). Tuhan tau ngena pangan ti sama Kristian tauka kaban diri sebilik awakka ngiring nuan.

10Ketiga enggau ke pengujung iya, kitai mesti besedia gawa enggau Tuhan. Allah Taala tau ngena sebarang orang tauka sebarang utai kena ngulihka juluk Iya. Mayuh utai ti nyadi di dunya tu ukai utai digaga tauka dikedeka Tuhan, tang utai nya tau dikena Tuhan ngulihka juluk Iya, ke mulia enggau basa Iya. Nadai utai di dunya tu ti ulih nyekat peneka enggau perambu Allah Taala. Raja Herod bisi kuasa besai tang iya enda ulih ngalahka Tuhan Jesus. Kitai mensia ulih madahka diri nemu tauka ngaga mayuh macham utai, tang enti iya amat diuji, bedau tentu iya mujur.

Reti nya, dalam kitai ti ngaga perambu tauka nguji ngulihka juluk ati kitai, dingaka jaku lalau Paul ba Rome 12:2, ti nyebut munyi tu: “Anang nitihka chara dunya, tang awakka Allah Taala ngubah chara kita berunding, ngambika kita nemu peneka Iya--iya nya utai ti badas, ti ngerinduka ati Iya, ti pemadu menyana.” Tuhan enda nagang kitai ngaga perambu tauka ngulihka juluk ati diri. Tang enti perambu enggau juluk ati kitai nya belaban enggau peneka Tuhan, Iya enda merekat utai ti dikedeka kitai nya. Lebuh utai nya nyadi, nuan bisi dua iti pemilih: nuan tau majakka juluk ati nuan nya ngena chara dunya. Tauka nuan nyerahka diri nitihka jaku Tuhan.

11Tu jaku pesan ngagai kita ti biak, ti baru deka ngangkatka pengidup diri: kita ti agi besekula; ti benung ngiga pengawa; baru berengkah gawa; tauka baru nirika rumah-tangga. Enti kita deka nyadi nembiak Tuhan, belajar ngasi baka Josep. Aku ukai ngasuh kita sengaja ngiga pemedis tauka penusah; tang enti kita bisi tetemuka utai ti nekul pengidup kita, anang jampat putus asa tang meruan bepegai ba Tuhan. Enda semua utai deka nyadi nitihka juluk ati kita. Perambu tauka pelan tau berubah; utai ti enda disadang tau nyadi barang maya, barang endur. Lebuh tusah, anang takut tauka malu minta tulung ari orang ti ulih ngiring kita. 12Semampai ingat: utai tau berubah, mensia tau mungkir; tang Tuhan kitai enda berubah; pengerindu enggau kuasa Iya tetap meruan, nyengkaum atas utai tauka orang ti nekul pejalai kita. 13Tuhan bisi pelan ti manah agi ke orang ti ngasika jaku Iya. Nya alai, lebuh kitai ngaga perambu ke taun baru, meruan bepegai ba Tuhan. Aku besampi minta berekat Tuhan bisi dalam pengidup kita taun 2024 tu. Selamat nyambut Taun Baru.

~Can. James Juhari~