Kangau Allah Taala Nuju Samuel - Jaku ajar ari Canon James Juhari

 

Epipani 2

OT: 1 Samuel 3:1-10 (11-20)

NT: Pemandang 5:1-10

Gospel: John 1:43-ujung

Jaku Ajar

Lapan-belas taun ti udah aku bediri ba pulpit tu meri jaku ajar ba Sempekat Lama ti udah dibacha tadi.  Maya nya kitai nyambut Hari Nembiak Diosis (Diocesan Youth Sunday).  Hari Minggu siti tu tadi aku bejakuka pasal  baptisa Jesus ti alai Triniti diayanka ngagai kitai. Minggu tu tadi aku mega bejakuka pasal kebuah kitai ngagai Allah Taala nya Apai kitai, enggau reti iya ba kaul antara kitai enggau apai kitai ti di dunya tu.    

Pagi tu kitai belamatika 1 Samuel 3: 1-10, ti alai Samuel ninga kangau Tuhan. Iya maya nya baru beumur 12 taun.  Samuel tu anak Elkanah enggau Hanah. Elkanah bisi 2 iku bini - Hanah enggau Peninah. Peninah bisi mayuh anak tang Hanah nadai. Nya alai iya bendar besembiang ngagai Tuhan lalu besemaya enti iya beranak, iya deka nyerahka anak nya ngagai Tuhan. Nya alai udah Samuel diadaka iya diserahka indai iya ngagai Tuhan lebuh iya agi mit, lalu iya diau enggau imam ti benama Eli, ba rumah sembiang.    

Eli bisi dua iku anak, Hopni and Pinehas, ti sama nyadi imam.   Tang seduai tu “orang ke jai. Seduai iya enda bebasaka TUHAN” (1 Sam.2:12), lalu enda ngasika jaku apai seduai.   Laban Eli nyau tuai lalu anak iya enggai ngasika jaku iya, nya alai Allah Taala nganjung siku nabi awakka madah ngagai Eli, Iya deka ngambi tanggung pengawa imam ari Eli. Anak iya ti dua iku deka kena bunuh, lalu orang bukai deka diangkat lalu dichirika nyadi imam.   

Aku deka ngena bacha ari Sempekat Lama tu dikena nyaup kitai meretika pasal perambu Allah Taala ba orang ti biak dikena ngulihka juluk Iya; enggau nama reti iya ba kaul kitai ti apai-indai enggau bala anak kitai.  

Bup Kudus ngembuan mayuh bendar cherita pasal Tuhan ti ngangau enggau ngena bala orang ti biak kena ngulihka juluk Iya.  Ba Bup pemungkal kitai ninga pasal Josep ti dijual bala menyadi iya (Pemungkal 37), lalu nyadi ulun di menua Ejip; tang ba pengujung cherita Joseph dichirika nyadi gabenor di Ejip.   David, diasuh apai iya, Jessi, ngibun bedus, tang dichiri ulih Samuel, nyadi raja menua Israel (1 Samuel 16).  Allah Taala ngena siku orang bujang, Daniel enggau 3 iku pangan iya ngubah sejarah menua Israel lebuh sida diambi gawa ba istana raja Babilon (Daniel 1).  Allah Taala mega bisi perambu enggau bala anak mit.   Tu utai ti disebut Jesus pasal anak mit ba Mark 10: 14 & 15: “Awakka sida ke mit datai ngagai Aku. Anang nagang sida, laban Perintah Allah Taala diempu orang ke baka sida tu.  15 Enggau bendar Aku madah ngagai kita, barang sapa enda nerima Perintah Allah Taala baka anak mit, enda ulih tama ngagai Perintah nya.”   Nabi Jeremiah dipilih Tuhan sebedau iya ada.  Ku Tuhan bejaku enggau iya: “Sebedau Aku nempa nuan dalam kandung indai nuan, Aku endang udah ngelala nuan, lalu sebedau nuan ada, Aku endang udah milih nuan; Aku endang udah ngeletak nuan nyadi nabi ke semua bansa.” (Jeremiah 1: 5)

Lebuh kitai numbuhka Ministri Anak Mit enggau Gerempung Nembiak dalam Parish, kitai enda ngaga utai enggau sepeneka ati tang bepelasarka ajar dalam Bup Kudus.  Penemu orang ti tuai pasal tanggung pengawa bala nembiak ba gerija enggau komuniti udah jauh bendar berubah dibandingka enggau dulu menya. Nya kebuah ba gerija, kitai meda bala orang ti biak majak mayuh meri diri ngereja pengawa Tuhan.     

Tang enda semua bala apai-indai ngembuan penemu ti sama pasal anak diri. Ba penemu sida, tu ukai maya bala nembiak berundingka pasal pengawa Tuhan tauka kiruhka gerija, laban tu maya sida patut belajar, ngiga pengawa tetap, lalu ngaga perambu nirika rumah tangga.  Aku besetuju: bala nembiak kitai mesti belajar bendar, ngiga pengawa ti manah - enti ulih, ngambi penuduk ti pemadu tinggi ba opis perintah tauka kompeni, tauka muka bisnes diriempu.  Tang lebuh bala nembiak kitai nguji ngulihka semua utai tu, kitai ti apai-indai ngembuan tanggung pengawa ngiring sida arap sereta ngelala Tuhan Jesus.

Nama kebuah tu beguna?  Lebuh anak kitai ninggalka rumah nampungka pelajar sida ba college tauka universiti ba endur bukai, apai-indai enda agi ngemataka pengawa enggau pemindah sida. Pengidup sida deka berubah; penemu sida deka berubah; lalu pengarap sida mega deka berubah.  Utai ti ngubah sida mayuh macham - pangan ti enggau sida begulai, orang ti ngajar sida, tauka sebarang orang ti enggau sida betemu.  Kitai mensia endang selalu ngereja utai ti ngerinduka ati kitai tauka ngulihka untung ti besai ngena chara ti mudah - enti kitai diberi peluang.  Tu utai ti tau ngasuh kitai ninggalka pengarap tauka melakangka Jesus.    

Sekeda parish agi bisi sekula Mission ti alai nembiak sekula bisi awak ninga Bup Kudus enggau diajar besembiang.  Tang ba endur ti semina bisi sekula perintah, gerija betanggung-jawap ngajar bala nembiak pasal Bup Kudus enggau besembiang. Kitai beterima kasih ke bala pengajar enggau sida ti nulung ngemataka anak kitai maya kitai besembiang.      

Utai ti ku aku iya nya, sida ti nembiak mesti dibai ngagai rumah Tuhan enti sida deka belajar ngelala peneka Tuhan ba sida.  Semua kitai ti apai-indai endang ngarapka anak kitai mujur dalam pengidup.  Jaku ti kala disebut apai-indai ngagai anak munyi tu: “Nuan anang baka aku”.  Nama tuju kitai lebuh kitai mansutka jaku munyi nya?  Apai-indai ti mansutka jaku munyi tu bisi juluk ati ti tinggi suba tang enda tulihka juluk nya.  Lalu dalam pengingin sida deka meda anak mujur, sida mega ngarapka anak tauka uchu sida ngulihka juluk sida ti nadai penyadi.  Nadai salah kitai meri jaku peransang ngagai sida ti biak, tang enti kitai meransang sida ngulihka utai ti enda diulih kitai tauka nampung pengawa kitai ti apin tembu, iya tau pulaika penanggul ngagai anak-uchu kitai.   Amat sida nya anak-uchu kitai tang sida bisi pengidup diriempu; lalu peneka enggau pelan Tuhan ba sida enda sebaka enggau peneka Tuhan ba kitai ti apai-indai.   Nya alai lebuh kitai ngiring anak-uchu kitai, tentuka peneka kitai ba sida nya sama enggau peneka Tuhan.  Nya guna kitai besembiang.  

Enti kitai amat ibuhka pengidup anak kitai, serahka sida ngagai jari Tuhan laban Iya bisi pelan ti manah agi ke sida.  Pemujur pengidup enda ulih sukat ngena pemayuh duit enggau pemesai pangkat ti diulih kitai, tauka pemesai rumah ti alai kitai diau. Manah enti anak kitai mujur, nyadi kaya enggau bepangkat besai, tang utai ti lebih beguna nya anak kitai mega ngembuan ati lurus, bisi penaluk, enggau pengerindu (“integriti”).  

Lebuh Tuhan ngangau Samuel, iya dalam rumah sembiang.  Nya nunjuk ngagai kitai nembiak Tuhan mesti ba endur ti betul ti alai sida ulih ninga jaku Tuhan - lalu endur ti pemadu manah nya gerija.  Program ti diatur ba parish baka Children’s Ministry enggau Youth Fellowship endang dikena gerija nyikap bala anak kitai awakka sida ulih dibai semak agi enggau Tuhan.  Tang program ti bansa tu nadai pulaika penguntung nembiak enti bala apai-indai enda nyukung iya.

Nama utai ti patut ditentu kitai sebedau kitai ngelepaska bala anak kitai ari ruang bilik kitai? 

Terubah iya, bala anak kitai mesti nemu sapa Tuhan ti dikarapka sida. Enti kitai deka mai ubah ngagai dunya, kitai enda tau enda bisi pengarap sereta ngelala Tuhan ti ngaga dunya.  Ba John 15: 5 Jesus madah, "Aku tu pun anggur, kita nya dan. Orang ke meruan dalam Aku, lalu Aku meruan dalam sida, deka bebuah lebat, laban enti nadai Aku, kita enda ulih ngereja sebarang utai.” 

Nama penyadi enti orang ti nyadi tuai komuniti tauka pemesai perintah enda ngelala sereta nadai penangika Tuhan?  Sida deka ngereja pengawa nitihka ati sida empu, nyengkaum ngereja utai ti enda lurus.  Lalu enti nembiak Tuhan enda bepelasarka Jesus, sida mega nadai guna ba Tuhan.  Sida enda ulih mansutka asil ti dikedeka Tuhan laban chara sida ngereja pengawa nadai bida ari orang ti nadai pengarap ba Tuhan.

Kedua, nembiak kitai mesti belajar sereta ngelala semua utai di dunya tu enggi Tuhan magang.  Mark 10: 17-22 nusui cherita pasal siku orang ti kaya (dipelabaka dalam kandang umur 30 taun) ti nanya pasal nama utai ti patut digaga iya awakka bulih pengidup meruan. Jesus ngasuh iya ngasika Pesan Allah Taala, tang iya madahka diri endang udah ngasika semua Pesan ari mit. Jesus ngelala orang tu kelalu rinduka duit.  Nya alai Jesus ngasuh iya nyual semua reta-tengkira, lalu meri ngagai orang ti seranta, lalu udah nya nitihka Jesus.   Orang nya mupuk ari nya tusah ati.    

Enti nembiak kitai deka nyerahka pengidup sida ngagai Tuhan, Tuhan mesti bempu semua.  Nya ukai reti sida nyerah semua duit enggau reta tengkira ngagai Tuhan, laban peminta Tuhan ba siku-siku kitai enda sebaka.     Jesus nyebut ba Matthew 16:24, “Enti orang deka nitihka Aku, awakka iya badu agi berundingka diri empu, ngesan regang iya, lalu nitihka Aku”.  Enti kita deka nyadi nembiak Kristus, kita mesti ngasika jaku Iya ari pun dataika pengujung.   Kita tau belajar, gawa, bemain baka nembiak bukai tang juluk kita ukai semina pasal “kita empu”, “peneka kita”, “penguntung kita” tang Tuhan enggau peneka Tuhan; enggau bakani kitai ulih nulung orang bukai enggau ngangkatka komuniti.   

Pekara ketiga enggau ke penudi iya baka tu: bala nembiak kitai mesti nemu nama perambu Tuhan ba pengidup sida.  Enti bala nembiak kitai bisi perambu, tuju enggau juluk ati; nya utai ti manah.  Aku rindu meda nembiak udah nemu berunding deka ngangkatka komuniti, bisi ati deka ngereja utai ke pemanah menua enggau pemansang bansa.  Tang ingat, enti nuan deka gawa enggau Tuhan, juluk ati nuan nya mesti nitihka peneka enggau perambu Tuhan.  Reti nya, pemanah ti deka dikereja nuan nya ukai semina datai ari runding nuan empu, tang diiring ulih Roh Kudus.   

  Aku mega nemu sekeda nembiak semina berundingka sida empu, lalu semina deka ngulihka penguntung ke diriempu. Orang bukai semina ba mata sida, semina baka tangga endur sida berindik kena niki ke atas enggau ngulihka juluk ati sida.  Kadang-kadang apai-indai enggau diri sebilik pen dilaban lalu digaga nyadi munsuh.  Sekeda nembiak endang idup nadai tinjau, tuju tauka juluk: baka papong tauka batang kayu ti anyut kulu-kili ba sungai.   Aku nemu bakani asai ati kitai ti apai-indai meda anak kitai nyadi bansa nya: ringat bisi, sinu ati bisi, nesal pen bisi.  Enti tu utai ti diasai sekeda kita ti apai indai, anang jampat putus asa, anang badu rinduka anak kita, taja pen nya ukai utai ti dipinta kita.  Meruan besampika sida, serahka sida ngagai pengerindu Tuhan.  Kitai enda nemu nama saut Tuhan.   Rome 8: 28 nyebut: “Kitai nemu, dalam semua utai, Allah Taala endang bekereja ke penguntung orang ke rinduka Iya, ke dikangauka Iya nitihka juluk ati Iya”.

Jaku penutup: Ingat, Allah Taala rindu gawa enggau bala nembiak ba dini alai, enda ngira nama utai ti nyadi.  Tang Allah Taala begunaka saup ari kitai ti apai-indai.  Bala nembiak, taja sida bisi pemandai, pengering, juluk ti tinggi, agi bisi pengurang: penemu sida apin chukup dikena sida ngaga pemilih enggau pemutus ti amat beguna.   Tanggung pengawa kitai ti apai-indai iya nya ngiring bala anak kitai datai ngagai Tuhan, ngelala Iya, lalu nerima kuasa Iya atas pengidup sida.  

 Baka Eli ti meri peransang ngagai Samuel, baka nya mega kitai meransang enggau nulung anak diri mending sereta meretika jaku Tuhan.  Nya enda semesti iya nentuka semua utai deka nyadi nitihka juluk ati kitai. Tang iya deka nentuka dalam nama-nama utai ti nyadi, kitai nemu anak kitai agi nyadi nembiak Kristus, lalu agi dilindung Apai kitai di serega.  Kadang-kadang, ubah dalam pengidup anak-nembiak kitai begunaka ubah dalam pengidup kitai ti nyadi apai-indai enggau aki-ini  Reti nya, sebedau kitai ngasuh anak-uchu kitai ngelala Tuhan dulu, kitai empu ti apai-indai enggau aki-ini mesti dulu ngelala Iya 

Besampi kitai: Tuhan, kami nyerahka bala anak-nembiak kami ngagai jari Nuan sehari tu; minta Nuan ngayanka Diri ngagai sida. Saup manggika diri ba kuasa Roh Kudus lebuh sida dituntung sebarang penanggul.  Berika sida pengaga ati lebuh napi semua penusah; penyamai lebuh sida putus asa, enggau pengampun lebuh sida ngereja penyalah. Awakka Jesus Kristus nyadika pelasar pengidup sida; pengerindu Allah Apai ti meruan nyadika pengering sida, lalu Roh Kudus nyadika Penyaup sida.  Kami besampi dalam Jesus Kristus.  Amin.