Ngasika Tuhan - Jaku ajar Canon James Juhari

Epipani 3

Bacha:

Penyanggup Lama: Pemungkal 14:17-20

Penyanggup Baru: Pemandang 19:6-10

Injil: John 2:1-11

Jaku ajar

    

    Nitihka John tu “kereja ajih” ti terubah iya dikereja Jesus, nyadi ba Kana, di Galili. Kana nya sebuah genturung pendiau ba atas bukit Galili, kira 8 batu muakka utara Nasaret. Ayat 2 madahka indai Jesus bisi dia, lalu Jesus enggau bala murid Iya mega sama dikangau ngulu pengerami tikah nya. Kitai belabaka pengantin lelaki nya kaban Maria. 

    

    Pengerami tikah bansa Judah jeman nya kelia ukai pengerami ti mit, laban pengerami nya diatur sampai seminggu pengelama ba rumah pengantin lelaki udah pengantin indu dibai pulai ngagai rumah iya. Lalu pemakai enggau utai diirup mesti disediaka sepemanjai minggu nya dikena nyamu bala pengabang - bisi nya datai, bisi nya pulai. Semua ungkus kena berami nya ditanggung pengantin lelaki.     

    Ayat 3 madahka "Lebuh wain nyau abis, indai Jesus lalu bejaku enggau Iya, “Wain sida udah abis.” Wain nya abis dipelabaka laban sida enda ngadang bala pengabang ti datai nya mayuh. Ba orang Judah, tu ukai semina meri malu ngagai bala pengantin lelaki ti disadang nyendiaka pemakai enggau utai irup ti chukup ke bala pengabang. Nitihka adat orang Judah, pengabang bisi hak nyaman orang ti ngatur pengerami ketegal utai empa enggau utai irup enda chukup. Nya kebuah Maria irau ati lalu minta tulung

Jesus.

    

    Tang peratika jaku Jesus nyaut indai iya, “Indu, nya ukai pekara nuan tauka pekara Aku. Maya Aku apin datai.” Kala kitai ngangau indai kitai “indu”? Nadai. Nama kebuah Jesus enda nyebut “indai”? Iya ukai deka bejaku kasar enggau Maria. Jesus bejaku munyi nya dikena ngingatka indai Iya nadai kuasa meri perintah ngagai Iya ngereja utai. Nya tanggung pengawa Apai Iya di serega. Nya kebuah Jesus nyebut, “Maya aku apin datai”. Tang nya enda nagang Maria ngarapka Jesus ngereja utai dipinta iya. Lalu iya bejaku enggau bala orang gaji, “Kereja aja sebarang utai ti diasuh Iya.” 

    

    Ba luar rumah bisi 6 igi benda digaga ari batu. Ai dalam benda tu dikena orang bebasuka kaki enggau jari sebedau sida enggau orang berami. Lalu tiap iti benda tu ngundan kira 100 liter. Jesus lalu ngasuh sida orang gaji ngisi semua benda nya enggau ai. Reti nya penyampau ai dalam 6 igi benda nya enda kurang ari 600 liter. Udah semua benda nya diisi enggau ai, Jesus ngasuh sida ngauk ai nya lalu mai iya ngagai tuai gawai. Lebuh tuai gawai nyepi ai nya, ti udah bebali nyadi wain, iya lalu ngangauka lelaki ke benung ditikah, lalu bejaku ngagai iya, “Semua orang mantaika wain ti manah dulu, udah nya baru mantaika wain ti kurang agi nyamai, lebuh bala pengabang udah mabuk. Tang nuan udah naruh wain ti nyamai datai ke diatu!” 

   

     Kitai enda ibuh bekelikuhka baka ni ai nya tau nyadi wain, tang utai ti tau dikenang kitai ditu iya nya nama kebuah Jesus ngaga wain ngemayuh nya - 600 butul enti dikira nitih sukat kemaya hari tu. Utai ti terubah iya tau dipelajarka kitai ari cherita tu iya nya, lebuh Tuhan meri, Iya deka meri lebih ari utai ti dipinta kitai. Cherita tu ngajar kitai pasal pemanah Tuhan. Apai-indai pengantin nya ukai orang ti kaya; enti kaya, wain tentu enda abis tengah orang berami. Kitai ti udah kala ngatur pengerami tikah nemu pemesai ungkus iya. Nya baru sehari aja, ukai seminggu. Jesus nemu pengantin baru tu deka nanggung penusah ti berat agi udah pengerami tikah nya abis - iya nya utang ti besai. 

    

    Jesus nukar 600 liter ai nyadi wain ukai semina laban deka nyelamat pengantin nya ari pemalu laban enda chukup wain kena nyamu bala pengabang. Laluh 600 liter wain ti enda diirup pengabang tau disimpan lalu dijual kena mayar utang. Maria semina minta Jesus nulung ngadaka wain chukup ke pengabang ti datai. Tang Jesus meri lebih ari nya, dikena nyelamat pengantin nya ari penusah ti berat agi. 

    

    Nya mai kitai ngagai pekara ti kedua. Allah Taala selalu meri utai ti pemadu manah ba penudi iya. Selalu iya maya pengerami, wain ti pemadu manah diberi dulu; udah orang nyau puas ngirup, nya baru wain ti kurang manah dibantai. Laban enti pengabang udah ngelu pala, sida enda tentu nemu bagi antara ai ti manah enggau ti enda. Ulah kitai mensia endang tebal agi bansa nya: ngelantangka diri (enjoy) dulu, penusah nya kira dudi. 

    

    Tang Tuhan enda baka nya: lebuh Iya ngatur pengidup kitai, Iya selalu nyendiaka utai ti pemadu manah ba penudi iya. Bup Kudus ngembuan mayuh bendar cherita pasal nembiak Tuhan ti dituntung penusah enggau pemerinsa, tang ba pengujung Tuhan merekatka pengidup sida dua-tiga kali lipat jauh manah ari ti udah. Kita tau macha cherita pasal Jop, Josep enggau Daniel ba Sempekat Lama. 

    

    Lalu beserimbai enggau pekara tu, aku deka bejakuka pasal kitai ti besembiang minta tulung Tuhan. Tadi kitai ninga lebuh Maria datai minta tulung Jesus, saut Jesus, “Maya aku apin datai”. Reti nya, lebuh Tuhan nulung kitai, Tuhan mega ngeletakka atur enggau maya - ukai kitai. Nya alai peminta kitai enda semesti Iya diberi tekala nya, nitih ku ati kitai. Tu kebuah lebuh kitai besembiang, Tuhan baka ti enda ningaka serbana kitai. Tuhan lubah nyaut peminta kitai, ukai laban Iya enda kasihka kitai. Tadi aku madah Tuhan enda semesti merika kitai semua utai ti dikedeka kita, tang Iya deka merika kitai utai ti beguna ba kitai. (Ba peminta Maria, Jesus meri tekala nya, laban nya beguna). Nya alai, lebuh kitai besembiang anang semina minta utai ti dikedeka kitai; pinta nama utai ti manah sereta beguna ti udah disedia Tuhan ke kitai. Tuhan enda meri laban Iya nemu utai ti dipinta kitai nya enda mai penguntung ti meruan; kadang-kadang tau mai pengerusak enggau pemedis bukai ngagai kitai. Tuhan meri pemeri laban deka merekatka pengidup kitai, ukai deka nambahka pengerusak tauka pemedis kitai. Nya alai, enti sampi kita enda disaut Tuhan, tukar chara kita minta tauka utai ti dipinta kita. Tuhan tetap deka meri utai ti manah ke kita. Nya kebuah Paul nulis munyi tu: “Aku ngira, pemerinsa ti ditatka kitai diatu, enda ulih dibandingka enggau mulia ti deka dandangka ngagai kitai.” (Rome 8:18) 

    

    Ketiga, lebuh kitai bisi penusah tauka penyuntuk, kitai mesti ngaku diri tusah tauka suntuk. Maria datai ngagai Jesus madahka wain udah abis. Wain ba bansa Judah tanda pengerami enggau pengaga. Kitai mensia enda tau enda bisi awak berami enggau orang bukai, lalu bisi pengaga dalam ati. Nama utai ti patut dikereja kitai lebuh pengaga nyau mupuk langkang dalam pengidup kitai? Sekeda orang Kristian nyerara diri ari Tuhan ketegal penusah. Sekeda malu tauka takut datai ke gerija. Jaku peransang Tuhan pagi tu iya nya: dalam penusah enggau pemerinsa, kitai patut datai ngadap Tuhan baka Maria. 1 Peter 5: 6-7 nyebut, “Nya alai, diau enggau ati ti baruh, di baruh jari Allah Taala ti bekuasa, ngambika Iya ngangkatka kita tinggi ba maya ti patut. Serahka semua pengirau kita ngagai Iya, laban Iya ngibun kita”. 

    

    Ke penudi iya tu, lebuh kitai minta Jesus ngereja utai ke kitai, kitai mega mesti besedia ngereja utai ti diasuh Iya. Kereja ajih Tuhan nyadi ukai semina laban Jesus bisi dia. Sebedau nya, Maria udah dulu meri jaku lalau ngagai sida orang gaji: “Kereja aja sebarang utai ti diasuh Iya.” Nya alai lebuh Jesus ngasuh sida ngisi 6 igi benda dataika penuh, sida nitihka jaku Iya. Lebuh Jesus ngasuh sida ngauk ai nya lalu ngasuh tuai gawai ensepi iya, sida ngasika jaku Jesus. Siti agi ajar ngagai kitai pagi tu iya nya: pengawa Tuhan nyadi dalam pengidup kitai lebuh kitai ngasika jaku Iya. 

    Jaku penutup: Enti kitai deka meda pengawa Tuhan lalu ngasaika pengaga dalam pengidup kitai, kitai mesti dulu ngasika jaku Iya. Utai ti dipeda kitai nyadi tauka dikereja kitai dalam gerija, baka nyebut leka sampi, nyanyi pantun, macha lalu diterangka pasal Bup Kudus, meri pemeri, nyambut Sakramen - nya baka ai ti udah ditukar nyadi wain. Ai ti udah ditukar nyadi wain mesti disadung ngagai bala pengabang. Baka nya mega pengawa ti dikereja enggau utai ti didinga kitai dalam gerija - ukai utai ti dipelalaika kitai tauka disimpan kitai kediri. 

    Enti Jesus semina deka ngulihka wain kena nyamu pengabang, Iya tau ngereja pengawa nya belalai. Iya tau enda ibuh minta tulung orang gaji ngisi ai ke dalam benda nya. Tang tuju Jesus ukai semina deka nyamu bala pengabang. Utai ti lebih agi beguna ari wain nya pengantin ti nikah, bala murid enggau orang gaji - ti dipilih Jesus awakka ngelala sapa Iya. 

    Nya alai lebuh kitai datai ke gerija besembiang; anang semina ngira ngulihka utai ti dipinta kitai. Utai ti dipinta kitai nya beguna, tang Tuhan bisi perambu ti besai agi ba kitai. Tuhan beratika pengidup kitai - semengat, ati, runding, kaul kitai enggau Iya, enggau “potensi” kitai. Tang kitai mensia bisi sekat: kitai enda ulih meda utai ti dipeda Tuhan tauka nyagam penemu Iya. Ku Tuhan bejaku ba Isaiah 55: 8-9, “Runding Aku enda baka runding kita, lalu jalai Aku enda baka jalai kita. Baka langit ti tinggi ari atas tanah, baka nya meh jalai enggau runding Aku tinggi agi ari jalai enggau runding kita”. Tu meh kebuah kitai begempuru ditu, lalu tu meh kebuah aku nerangka pasal reti injil tu - awakka jarak runding antara kitai enggau Tuhan dibai semakka agi. 

    Pelajar ari cherita tu iya nya: enti kitai deka meda Tuhan bekereja dalam pengidup kitai, kitai mesti ngasika jaku Iya. Pengasi kitai ke Tuhan meri pengaga ti meruan - pengaga ti enda ulih dikachau orang tauka dirusak penusah, pemedis tauka penyakit. Tu pengaga ti ukai semina ngubah pengidup kitai empu, tang deka mai ubah ngagai orang bukai ti ngelingi kitai - diri sebilik, diri serumah enggau komuniti kitai. 

~Can James Juhari~