Reti Baptisa (Jaku Ajar Canon James Juhari)

Epipani 1, 7 Januari 2024

Theme: Baptisa (Nama reti lebuh kitai ngangau Allah Taala Apai kitai

Bacha:

Penyanggup Lama: Pemungkal 1:1-5

Penyanggup Baru: SKR 19:1-7

Injil: Mark 1:4-11

Jaku ajar

Pagi tu aku deka bejakuka pasal baptisa enggau bakani iya tau nyaup kitai meretika pasal Allah Taala lalu ngangkatka kaul kitai enggau Iya. Aku deka berengkah enggau baptisa John.

Ba Kereja Rasul 19: 1-7, Luke nusui cherita pasal Paul, dalam pejalai mission iya ti ketiga, bisi betemu enggau 12 iku orang di Epesus ti madahka diri nerima baptisa pengesal ati ari John Pemaptisa. Nama reti baptisa pengesal ati ti diajar John tu?

Mark 1: 2 madahka tuju ministri John iya nya dikena nyendiaka orang mayuh nyambut Jesus. John meri jaku tangkan ngagai orang Judah enda ngasuh sida ngumbai diri selamat laban sida ari peturun Abraham. Iya ngasuh sida ngesal ati ke dosa diri lalu dibaptisa. Tang baptisa John bisi sekat. John empu nemu nya lebuh iya bejaku nyebut, “Iya ke datai dudi ari aku lebih agi bekuasa ari aku, datai ke aku enda tau meremi lalu muka tali kasut Iya. Aku udah maptisa kita ngena ai, tang Iya deka maptisa kita ngena Roh Kudus.” (Mark 1: 7-8).

Sida murid dua-belas iku tu tadi udah ngesal ati ke dosa diri lalu nerima baptisa John, tang nya apin chukup. Sida mesti arap sereta nerima Tuhan Jesus, lalu diisi ulih Roh Kudus. Nya alai, udah sida ninga Paul nerangka pasal Jesus, sida lalu dibaptisa dalam nama Jesus Kristus; udah nya Paul ngengkahka jari iya atas sida, lalu sida nyambut Roh Kudus.

Diatu kitai beratika baptisa Jesus. Nitihka Bup Kudus, Jesus nadai dosa. Bup Kudus mega madahka Jesus kena uji Sitan (Matthew 4: 1-11), tang iya enda alah laban penguji. Nya alai, lebuh Jesus nganjung diri ngagai John minta dibaptisa, nya enda masuk akal ba kitai. John empu pen tekenyit ati. Tang saut Jesus mudah sereta pandak: “Awakka baka nya aja diatu. Laban kitai enda tau enda ngereja semua utai ti lurus” (Matthew 3:15). Jesus meri diri dibaptisa ukai laban Iya bedosa, tang laban deka nyemaka diri enggau kitai mensia ti bedosa. Reti nya iya ngambi lalu nanggung dosa kitai, nerima ukum ti patut diterima kitai lebuh iya mati ba kayu regang. Tang utai ti deka dikenang aku bekaul enggau baptisa Jesus iya nya, bunyi nyawa Allah Apai ti didinga bejaku ari serega, “Tu Anak ke dikesayauka Aku. Aku rinduka Iya” (Matthew 3:17); lalu Roh Kudus ti baka burung achang inggap ba Iya.

Batang pekara ti deka dikenang aku pagi tu iya nya pasal kitai ti udah dibaptisa ulih ai enggau Roh Kudus, udah dikangau nyadi anak Allah Taala. Nama reti lebuh kitai ngangau Allah Taala nya Apai kitai?

Nyau ka semua raban bansa di dunya tu ngira apai nya tuai bilik, ti ngembuan tanggung pengawa ngidup sereta ngintu anak sida. Tang enda semua orang ngembuan kaul ti manah enggau apai sida. Lalu pengurang tauka penyerekang kaul kitai enggau apai kitai tau nagang kitai ngelala pemanah Apai kitai ti di serega. Nya alai, lebuh Allah Taala nganjung Anak Iya Jesus Kristus ke dunya, siti ari utai ti diayanka Iya ngagai kitai iya nya ba senentang pengerapat kaul antara Iya enggau Tuhan Jesus. Siti pekara ti deka dikejakuka aku pagi tu, iya nya bakani ku kaul antara Jesus enggau Apai Iya di serega tau nyadika pelasar kaul kitai ti apai enggau bala anak kitai.

Bisi empat iti utai deka dikenang aku ditu. Terubah iya nya kuasa apai. Bup Kudus madahka Iya ti meri perintah enggau Iya ti ngaga pemutus nya Allah Apai. Lalu Allah Anak semina ngereja nama perintah ti diberi Allah Apai. Kuasa ba jari Apai, lalu Anak ngasika Apai. Tu jaku Jesus empu ba John 6: 38: “Aku udah datai ari serega, ukai deka ngereja peneka Aku Empu, tang ngereja peneka Iya ke ngirumka Aku”. Ba John 5: 19 Jesus nyebut, “Enggau bendar Aku madah ngagai kita, Anak enda ulih ngereja utai ngatika Diri, tang semina utai ti dipeda Iya kereja Apai, laban sebarang utai dikereja Apai nya mega dikereja Anak”. Lalu ba John 4: 34 Jesus nyebut, “Pemakai Aku nya ngereja peneka Iya ke ngirumka Aku, lalu nembuka pengawa Iya”. Utai ti nyata ba kaul antara Apai enggau Anak iya nya kuasa ti dipegai Apai. Allah Apai bekuasa atas semua utai. Jesus udah nunjukka teladan ngagai kitai, ngasuh kitai nunduk ngagai kuasa Allah Apai lalu ngasika Iya.

Hari Minggu tu tadi aku bejakuka pasal pengasi Josep. Sekeda orang nadai pengasi laban ba penemu sida orang ti selalu ngasika jaku orang bukai nya orang ti lembut, tauka sida dikuasa orang bukai. Tang iya ti bendar, pengasi nya kuasa ti dikena Allah Taala ngulihka juluk Iya. Laban Jesus ngasika jaku Apai Iya, peneka Allah Taala nyadi. Lebuh Jesus besembiang ba Kebun Getsemani, Iya besampi, “Apai, enti ulih, awakka mangkuk tu diambi ari Aku! Tang ukai nitihka peneka Aku, tang nitihka peneka Nuan.” Laban Jesus ngasika Apai Iya, Iya diregang, mati lalu angkat idup baru; ti ngujungka kitai bulih selamat. Lebuh kitai nyebut Allah Taala nya Apai, kitai ngaku Iya bisi kuasa atas kitai: nya alai, kitai mesti ngasika Iya.

Nama reti ngasika Allah Taala? Ngasika Allah Taala, reti nya enda agi bepanggai ba kuasa bukai. Kedua, kitai mesti minta iring Allah Taala sebedau kitai ngereja utai. Nya kebuah kitai besembiang, ngatur aum, bejuraika penemu, sebedau kitai ngaga nama-nama utai, dikena nentuka pengawa ti dikereja kitai nya nitihka peneka Tuhan.

Pekara ti kedua, iya nya kitai mesti rinduka Allah Taala enti kitai deka ngasika Iya. Kitai enda ulih ngasika Allah Taala enti kitai nadai pengerindu ke Iya. Lebuh kitai ngaku Allah Taala nya Apai kitai, reti nya kitai ngelala pengerindu Iya. Ba John 5: 20 Jesus nyebut, “Apai rinduka Anak, lalu ngayanka ngagai Anak semua utai ti dikereja Iya”. Kitai dilepas ari dosa ketegal pengerindu Tuhan: “Laban Allah Taala balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya” (John 3:16). Lalu pengerindu nya diayanka dalam kaul antara Apai, Anak enggau Roh Kudus (Triniti).

Jesus ngembuan kaul ti naka iya pemanah enggau Apai Iya di serega. Aku mega belabaka Jesus amat ngasaika pengerindu Josep ti ngintu Iya lebuh agi mit. Leka jaku Jesus ba John 15:9 ngembuan reti ti besai: “Baka Apai ke udah rinduka Aku, baka nya mega Aku udah rinduka kita. Meruan dalam pengerindu Aku”. Pengerindu ti nadai banding antara Apai, Anak enggau Roh Kudus mega diberi ngagai kitai. Pengerindu nya diayanka Iya ngagai kitai berengkah ari Jesus ada; lebuh Jesus bejalaika ministri Iya ngeraika orang sakit, ngampun dosa orang, muru antu; lebuh Iya mati ba kayu regang, angkat idup baru, niki ke serega lalu udah nya meri Roh Kudus Iya ngagai orang ti arap. Semua tu tanda pengerindu Tuhan ke kitai.

Ketiga, baptisa Jesus ngayanka ngagai kitai pengerapat kaul antara Allah Apai enggau Allah Anak. Ba mayuh kitai Kristian, “Allah Apai”, “Apai ti di Serega” tauka “Apai ti Pemadu Bekuasa” nya semina nama ti dikena kitai kena ngepunka sampi. Ba John 8:16, Jesus bejaku munyi tu lebuh Iya ngenangka pasal kaul Iya enggau Allah Apai: “…pemutus penemu Aku endang ngena, laban ukai semina Aku aja ke ngakim, tang Aku enggau Apai ke ngirumka Aku”. Ba John 10:30 Jesus nyebut, “Kami Duai Apai endang siku”. Nya terang nunjukka ngagai kitai Jesus enda kala ngereja pengawa Iya ngati kediri. Iya gawa begulai enggau Apai Iya. Iya bepanggai ba Apai Iya dalam semua utai. Lalu utai ti negapka kaul Iya enggau Apai nya sembiang. Tu utai ti patut dikingatka kitai maya besembiang: sembiang tu ukai dikena kitai ngasuh Tuhan ngereja utai ke kitai tauka meri utai ti dipinta kitai. Sembiang tu endur kitai nanggamka kaul enggau Allah Taala; endur kitai besemaya deka gawa enggau Iya, ngasika Iya, lalu diiring Iya.

Keempat, dalam kaul antara Apai enggau Anak bisi basa enggau mulia. Lebuh Jesus besembiang ba Kebun Getsemani sebedau Iya ditangkap, Iya nyebut munyi tu: “1Apai, maya udah datai. Muliaka Anak Nuan, ngambika Anak ngemuliaka Nuan…4Aku udah ngemuliaka Nuan di dunya tu, laban Aku udah nembuka pengawa ti diasuh Nuan kereja Aku…5Nya alai diatu, Apai, muliaka Aku di mua Nuan Empu ngena mulia ti dikemisi Aku di mua Nuan sebedau dunya digaga” (John 17: 1,4,5).

Sepuluh Pesan terang bendar madahka kitai mesti bebasaka apai enggai indai kitai. Baka kitai ti ngasika apai kitai ti di dunya, baka nya mega kitai mesti ngasika Apai kitai ti di serega, nitihka teladan ti udah diayanka Jesus enggau pesan ti ngasuh kitai bebasaka nama Iya, lalu rinduka Iya enggau pengabis ati, pengabis runding, enggau pengabis pengering kitai.

Kitai mesti ingat mega; ukai kitai aja ti meri basa ngagai Allah Taala. Allah Taala mega meri basa ngagai kitai. Allah Taala masa kitai lebuh Iya ngaga kitai neladanka gamal Iya (Pemungkal 1:26). Iya mega masa kitai lebuh iya merika kitai hak milih nama utai ti dikedeka kitai. Iya masa kitai, lebuh Iya datai ke dunya tu nyadi mensia laban deka nyelamat kitai. Ke pengujung iya ila, Iya deka masa kitai lalu mai kitai diau enggau Iya di serega.

Triniti ti diayanka ngagai kitai maya Jesus dibaptisa ukai semina nyadika batang pengarap kitai Kristian. Enti kitai ngaku Allah Taala ti disembah kitai nya Apai kitai, reti nya orang ti sama nyembah Iya dikira menyadi kitai. Enti kitai ngaku sida tu menyadi kitai, kitai ngembuan tanggung pengawa mela sereta bebasaka sida; lebih agi sida ti dikumbai kitai apai-indai.

 Lebuh Jesus mansang ngagai John minta dibaptisa, nya nandaka Iya nerima tanggung pengawa ti udah diletak ba Iya – iya nya idup enggau mati awakka nebus mensia. Baka nya mega, lebuh kitai datai ke gerija tauka dibai apai-indai kitai awakka dibaptisa, lalu udah nya ditetap; nya mega nandaka kitai besedia meri pengidup kitai ngagai Tuhan, lalu mela orang bukai baka Tuhan Jesus ti udah mela kitai.

~Can. James Juhari~