Ditempa Neladan ke Gamal Allah Taala, Bebaik Baru ulih Kuasa Iya - Jaku Ajar Canon James Juhari

Jaku Ajar Hari Minggu 2 Apin Lent

Penyanggup Lama: Jaku Dalam 8.1, 22-31

Penyanggup Baru: Kolosi 1.15-20

Injil: John 1.1-14

Jaku Ajar

Dalam Sampi Hari Minggu tu kitai tadi nyebut munyi tu: “Tuhan Allah ti pemadu bekuasa, Nuan udah ngaga serega enggau bumi lalu ngaga kami neladan gamal Nuan empu: ajar kami ngambika kami ulih ngelala jari Nuan ba semua utai ti digaga Nuan lalu meda gamal Nuan ayan ba semua nembiak Nuan…”

Sehari tu aku deka bejakuka pasal nama reti nyadi mensia ti digaga Tuhan neladan gamal Iya, enggau baka ni Tuhan agi kiruh ngemataka kitai dataika diatu.  Aku deka bejakuka siti pekara ti tau ngaul kitai semak agi ngagai Tuhan tauka nyeraraka kitai ari Iya - iya nya pasal pengerai enggau penyakit.  Aku ukai semina deka bejakuka pasal pengerai enggau penyakit ba tubuh tang pekara ti suah bebalut enggau runding enggau ati (emosi) kitai.   

Kitai semua nemu pasal pengawa ti ngubat orang sakit ba klinik enggau sepital.  Kelimpah ari nya bisi orang berubat ngena chara bukai baka “acupuncture”, bekam, urut, ngena “herba” enggau “homeopathy”.  Chara bukai nyengkaum minta saup ari kuasa roh baka belian enggau bedukun. Kitai Kristian mega bisi chara bukai, nitihka teladan ti udah diajarka Jesus, ti alai kitai ngena jalai sembiang.   

Kitai Kristian bisi pengarap ba kuasa sembiang kena ngeraika penyakit laban kitai nemu Tuhan bisi juluk ti manah ba kitai.   Cherita dalam Bup Pemungkal madahka lebuh Allah Taala ngaga mensia, iya nadai penimpang enggau pengurang.  Penimpang, pengurang, pemerinsa, penyakit dosa enggau pemati datai laban Adam seduai Awa ngelaban pesan Allah Taala.  Taja pen seduai udah bedosa ngelaban Tuhan. Tuhan agi kasihka seduai.  Allah Taala ngari seduai ngena kulit jelu (Pemungkal 1:21) ngambika seduai enda telanjai.  Lalu sepemanjai cherita dalam Sempekat Lama kitai macha pasal pengasih enggau pengerindu Tuhan ke mensia.   

Lebuh penulis Sempekat Lama bejakuka pasal pengelepas, sida ukai semina ngenang pasal pengelepas semengat.  Sida nusui pasal Allah Taala ti ngelepaska mensia ari pemati  (Masmur 6: 4-5); ari penangi enggau penakut (Masmur 107:13). ari penyakit (Isaiah 38:20) enggau ari mayuh macham penusah (Jeremiah 30:7).  1 Samuel 14: 23 bejakuka pasal Allah Taala ti  ngelepaska orang Israel ari munsuh sida.  Kadang-kadang Allah Taala milih orang baka Moses, Samson or Gideon, ti diasuh Iya nulung ngelepaska bansa Israel.  

Pengawa Jesus ti ngelepaska mensia ti dibacha kitai dalam Injil nya nampung pengawa ti dikereja Allah Taala kena nulung bansa Israel ba Sempekat Lama.  Tang siti bida antara pengawa Tuhan ba Sempekat Lama enggau Sempekat Baru, iya nya tulung enda agi semina diberi ngagai orang bansa Israel aja. Lebuh Jesus ngeraika orang sakit tauka ngelepaska orang ti dirasuk antu, Iya enda milih bansa tauka peturun.   Nya alai, orang ti minta digeraika Jesus nya bansa bukai ti datai ari Samaria, Gadara, Siseria, Siria (Matthew 4: 24-25). Tang tuju pengawa Tuhan meruan sama - ngeraika orang sakit enggau nyelamatka orang ti bedosa.  Dua-dua pengawa tu dipejalaika sereta. Penyakit ba tubuh enggau penyakit ba semengat bisi kaul enggau pangan diri.  Nya kebuah orang ti digeraika Jesus begunaka pengarap ba Iya (Peda Mark 2: 5 & Mark 10: 52).  

Ngeraika orang sakit ngena chara sembiang ukai semina dikereja Jesus.  Ba Surat Pasal Kereja Rasul enggau ba epistola (baka 2 Korint 12:12 enggau James 5:16), kitai mega macha pasal bala rasul enggau tuai eklesia ti ngeraika orang sakit ngena chara sembiang.    Semak 200 taun udah lepas nya (dalam Abad Kedua), penulis sejarah eklesia baka Justin, Irenaeus, Tertullian enggau Augustine ari Hippo bisi nulis pasal orang sakit ti digeraika ulih kuasa sembiang jeman nya kelia.     

Kitai kemaya hari tu agi ngemeranka pengawa ti besembiang enggau ngeraika orang sakit laban kitai diasuh nampungka pengawa ti udah dikereja Jesus dulu menya. Lebuh Jesus nganjung bala murid Iya nusuika Berita Manah Iya mega “meri sida kuasa muru semua antu, enggau ngeraika penyakit, lalu ngasuh sida madahka berita pasal Perintah Allah Taala, sereta ngeraika orang ke sakit” (Luke 9: 1-2).  Ba Luke 10: 9, Jesus meri pesan ngagai 72 iku murid iya enggau jaku, “Geraika orang ke sakit dalam nengeri nya, lalu sebut ngagai sida, ‘Perintah Allah Taala udah datai semak kita.”  Nya kebuah lebuh kitai bejakuka pasal Perintah Allah Taala, kitai mega bejakuka pasal kuasa Perintah Allah Taala.  Kitai ukai semina nusui Injil tang besembiangka orang sakit, ngampun penyalah orang ti bedosa, lalu ngelepaska orang ti dirasuk antu.  

Tang utai ti suah ditanya orang iya nya: Nama kebuah sampi kitai suah enda mansutka asil? Nama kebuah sekeda orang ti disembiang kitai gerai, sekeda enda?  Pengawa Tuhan nya siti “misteri” ti enda ulih sagam runding kitai mensia.  Matthew 17: 14-21 nusuika pasal bala murid Jesus empu ti enda mujur ngelepaska orang ti kena rasuk antu.  Paul udah kala besampi lalu ngeraika orang sakit, nyengkaum ngidupka Eutikus ti mati labuh ari rumah tingkat 3 (Kereja Rasul 20:9).  Tang lebuh iya besampi 3 kali minta Tuhan ngeraika pemedis iya, Tuhan nyaut iya, “Pengasih Aku chukup ke nuan, laban kuasa Aku nyadi pemadu badas lebuh nuan lemi.” (2 Kor. 12: 8-10).  Ba 2 Timoti 4: 20, iya madahka diri “ninggalka Tropimus di Miletus, laban iya sakit”.

Sembiang kitai ke orang sakit baka ti enda mujur ukai laban Tuhan enda kiruh.  Aku nyangka siti ari kebuah iya nya laban kitai enda minta enggau bendar.  Aku nemu sekeda paderi tauka tuai gerija enda arapka Tuhan agi ngeraika orang sakit.  Baka ni kitai tau meda kuasa Tuhan bekereja enti orang ti nyadi tuai eklesia enda arapka kuasa Tuhan?    

Kedua, ba dini endur Tuhan bekerja, Sitan mega kiruh bekereja.  Minggu siti tu kemari kitai ninga cherita pasal orang ti dirasuk antu datai ngagai rumah sembiang.  Luke 13: 11-16 nusui pasal siku indu ti bungkuk 18 taun laban kena tanchang Sitan.  Udah Jesus ngelepaska iya ari kuasa Sitan, iya ulih bediri lurus.  Kadang-kadang lutur pen enda nemu kebuah orang tau sakit enggau baka ni ngubat.  Enda semua penyakit ti enda ditemu kebuah datai ari Sitan magang, tang kitai nemu, Sitan deka beambi ulih ba pemedis ti diasai kitai enti iya diberi peluang.  Nya kebuah kitai besampika orang sakit: ukai semina minta sida gerai, tang awakka sida dilindungka ari kachau Sitan tauka mungkir ari Tuhan.     

Ketiga, kebuah sampi kitai enda ngasi laban kitai ukai Tuhan.  Amat kitai diberi Tuhan pemeri ngeraika orang sakit, tang pengelembut, dosa enggau pemereti ati kitai ti agi mekang, tau nyekat pemujur pengawa kitai.   Kitai Kristian ti bisi pemeri ngeraika orang sakit mesti ingat: kitai nadai kuasa ngereja nama-nama utai enti enda ketegal Jesus.  Kita tu semina perengka dikena Tuhan ngereja pengawa Iya barang maya Iya begunaka kitai.     

Baka ni ku kitai bejakuka pengawa ti ngeraika orang sakit ngena kuasa sembiang?  Terubah iya, kitai mesti ingat: Tuhan nya pun pengerai tubuh enggau semengat kitai.  Tang laban kitai agi idup di dunya ti ngembuan mayuh pengurang, kitai enda ulih ngasaika pengerai tubuh enggau semengat ti chukup.   Lebuh kitai bejakuka pasal pengelepas ari penusah enggau digeraika ari penyakit ulih Tuhan, kitai ukai semina bejakuka pasal ngiga penyamai enggau pengerai tubuh.  Juluk ati semua kitai ti nyadi orang Kristian iya nya deka begulai enggau Apai kitai di serega. Lalu kitai ukai naka deka idup nyamai kediri dalam dunya.  Reti nya lebuh siku ari kitai dituntung pemedis, penyakit tauka penyuntuk, kitai ti sama pengarap mesti nulung iya ti tusah. Lalu orang ti dituntung penusah anang nyerara diri ari orang gerija, lalu enda tau malu minta tulung; laban lebuh orang ti sama pengarap nyaup diri sama diri, dia Tuhan mega bekereja. Lalu iya ti nulung enggau iya ti ditulung sama-sama nerima berekat Tuhan.    

Kedua, ba Pemansut 15:26 Allah Taala terang bendar bejaku: “Aku tu TUHAN ti ngeraika kita”. Kadang-kadang Allah Taala nulung ngeraika tubuh kitai ngena kuasa tubuh kitai empu (immune system kitai), tauka ngena ubat ti diberi lutur. Iya mega tau ngena sembiang orang ti arapka Iya.  Iya tau enda ngeraika kitai baka Iya enggau Paul.  

Ketiga, tiap kali kitai tetemuka penusah tauka pemedis, kitai mesti ngadap Tuhan lalu nanya ba senentang ni kitai bisi pengurang enggau penyalah.  Kadang-kadang pemedis kitai enda semesti ketegal penyalah kitai empu.  Tuhan mega tau ngena pemedis enggau pemerinsa kitai ngulihka berekat ti besai agi.  Kitai enda nemu perambu Tuhan ba kitai.  Nya kebuah dalam penusah enggau pemedis, kitai datai ngadap Iya dalam sembiang; ukai deka mejal Iya merika kitai utai ti dipinta kitai.  Sembiang kitai deka nyaup kitai ngembuan pemaruh ati, tegap ba pengarap, sereta ngelala pengerindu Tuhan. Nambahka nya, Allah Taala bekuasa atas semua utai: lalu lebuh kitai nyerahka pengidup kitai ngagai Iya, Iya nemu nama ti patut digaga.      

Utai ti suah nekul pengarap kitai ba Tuhan iya nya perangai kitai ti suah berati tauka fokus ba penanggul enggau penusah ti nuntung kitai.  Kita ingat cherita ba Matthew 14, lebuh Peter nguji bejalai atas ai?   Udah Peter nurun ari perau, iya ulih bejalai atas ai enggau Jesus.  Tang lebuh iya beratika gelumbang iya belabuh tengelam. Lebuh kitai tusah, jarang bendar kitai berundingka pemanah ti deka dikereja Tuhan; kitai suah agi berundingka utai ti jai ti deka nyadi.  

Kitai Kristian ukai semina arapka Allah Taala: kitai mesti arapka Allah Taala ti ulih ngelepaska kitai ari penusah ti nanchang kitai. Ba John 14:1, Jesus bejaku ngagai bala murid Iya, “Anang tusah ati. Arapka Allah Taala, lalu arap mega ke Aku”.  Jesus meransang sida arapka Allah Taala taja sida enda meretika utai ti nyadi, laban Iya bekuasa atas semua utai.  Jaku Dalam 3: 5-6 nyebut: “Panggaika diri ba TUHAN enggau pengabis ati nuan. Anang manggaika diri ba penemu diri empu.  Awakka TUHAN seruran ngiring nuan, nya baru Iya deka nunjukka jalai ti ngena ngagai nuan”.

Tu pengamat ti enda ulih sangkal kitai: penusah tau datai ba pengidup kitai barang maya, barang endur.  Nama utai ti deka dikereja kitai lebuh kitai enda nemu chara sereta nadai jalai ngemansutka diri ari penusah?   Masmur 9: 9-10 ngajar munyi tu:  “TUHAN nyadi kuta alai orang ngenduh lebuh sida kena perinsa, nyadi kuta alai sida diau lebuh maya tusah.  Orang ke nemu Nuan, TUHAN, deka manggaika pengarap sida ba Nuan. Nuan enda ninggalka orang ke datai ngagai Nuan”.  Dalam penusah kitai mesti manggaika diri ba jari Tuhan.   

Nama penyadi enti kitai enda bepanggai ba Iya?  Kitai enda ulih nerima kuasa, pengasih. enggau pengerindu ti udah diagih Iya ke kitai. Enti pengarap kitai ba Tuhan lenyau, kitai nadai pengelantang, pengaga, enggau pemaik ti meruan.  Aku ukai bejakuka pasal “happy hour” lebuh kitai berami beserumpu enggau bala pangan tauka kaban tauka udah kitai terima gaji.   

Nama penyadi orang ti semampai bepegai ba Tuhan?  Bup Kudus madahka Tuhan enda ngelengka orang ti arapka Iya.  Baka Iya ti merekatka orang Israel menya, Iya mega deka merekatka kitai diatu.  Lalu berekat Tuhan nya nyengkaum ngasaika pengerindu, pengasih, pemaik, enggau pengelikun enggau pengering. Iya besemaya deka merika kitai pengidup meruan.    

Siti agi utai deka nyadi lebuh kitai manggaika pengarap ba Allah Taala. Kitai deka meri mulia ngagai Iya.  Nuan deka nyadi garam  ngagai pengidup ti udah tabar; lalu meri penampak ngagai orang ti agi idup dalam petang.  Orang bukai deka nemu sapa Tuhan  ti disembah nuan, ti ngubah pendiau nuan.       

 Tanya Tuhan ngagai tiap iku kitai sehari tu iya nya: “Kati, nuan agi arapka aku?”  Agi ke enda nuan arapka Tuhan dalam nuan ti nempuh pemetang; lebuh utai ti nyadi ngelingi nuan nadai ngena magang?  Agi ke enda nuan arapka Tuhan taja leka sampi nuan baka ti enda didinga Iya?  Ulih nuan meruan arapka Tuhan lebuh pengidup asaika nadai tuju, lalu nuan enda meretika utai ti nyadi dalam pengidup nuan?  

~Can. James Juhari~