Meda ari Sukut Perintah Allah Taala: Diau dalam Pengelurus Ulih Pengarap - Jaku Ajar Fr. Walter Macdaniel

Jaku ajar Minggu Lent 2 (25.02.2024)

Penyanggup Lama: Pemungkal 17:1-7,15-16

Epistola: Rome 4:13-ujung

Injil: Mark 8:31-ujung

Jaku ajar

“Rari nuan ari Aku, Sitan. Laban nuan berundingka utai mensia, ukai utai Allah Taala” (Mark 8:33). Aku ngasaika tu sebagi ari penanggul kitai nyadi orang Kristian alai suah agi kitai bibat antara dua pengingin; ingin deka arap ka Allah Taala ti enda ulih dipeda kitai sereta pengarap kitai ba dunya ti segenda tu alai penusah acuk mata, pemerat amat ditapi ba batang tubuh lalu suah agi penusah tu tau diputar ngena penauk enggau penemu kitai empu. Enti nundaka konteks ayat ti dulu agi ari ayat ba atas tu, ba Peter, runding Jesus ti deka mansang ke Jerusalem lalu mati tu tau diputarka enggau chara nagang Jesus mansang kin. Chukup muntang. Nya meh kebuah Jesus nangkan Peter ngena jaku ba ayat 33 laban iya enda ulih meda ngelui ari peragam mensia; meda ari gaya Perintah Allah Taala. Ba jaku ajar saritu, aku deka mai kitailebih agi ba musin Lent tu meda semua utai ba pengidup kitai tu ari chara Perintah Allah Taala.

  

Utai ke terubah ti patut dikerundingka kitai enti nyema kitai deka idup beduduk ari chara perintah Allah Taala ianya bakani ke kitai tau nyadi murid Jesus Kristus. Munyi ku Kristus, “Enti orang deka nitihka Aku, awakka sida badu agi berundingka diri empu, ngesan regang diri, lalu nitihka Aku” (ayat 34). Reti iya ditu, nyadi murid Jesus begunaka kitai idup nulak pengingin diri empu, sanggup merinsa, lalu nitih ke Iya. Bakani ke gaya berundingka tu? Perundingka tu ulih kita, lebuh kitai ngereja utai, kitai keran ngereja nya laban bisi juluk. Endang gaya kitai mensia alai kitai ngereja beduduk ari juluk ati kitai. Lebuh Allah Taala ngangauka Abram (udah nya iya dikangau nyadi Abraham) pansut ari menua ti dikumbai Ur ba Pemungkal 12, Abram nyaut kangau nya laban iya (nundaka pendiau bansa maya nya ti suah mindah) deka ngasaika pengidup ti lantang sereta meruan ke sida sebilik enggau jelu tupi iya. Tu endang chara mensia berunding. Semaya Tuhan ba iya chukup badas ba pendiau iya maya nya. Nyadi ba kitai ti macha cherita Abraham tu lalu utai ti nyadi ba peturun iya (peturun iya meh ti ngadaka bansa Israel), dia kitai tau ngumbai pemutus Abraham nyaut kangau Allah Taala nya senutuk bendar. Tang, kitai, baka Abraham mega, enda ulih meda pengujung pejalai pengidup kitai empu. Ba runding Abraham maya ke dikangau, iya semina nemu iya deka idup.

 Suah bendar, bisi ba maya pengidup kitai ti nyadi Kristian, kitai ngaga pemutus ketegal ti deka idup. Kitai nyaut kangau Allah Taala beduduk ba pengasai ati kitai ba penusah ti nyadi dalam pengidup kitai maya nya (penyakit, tinggang penusah, kena penguji ti berat dalam ruang bilik, bibat enggau runding ti bekachau, mayuh agi kebuah ti enda ngelantang ke ati). Taja pen manah pama kitai nyaut ketegal deka idup, kitai tau saru penemu dudi hari ngumbai Allah Taala ngangauka kitai laban deka merekatka semina kitai aja tekala nya ketegal penaluk kitai nyaut kangau Iya. Pejalai pengarap nya sama dikemeratka baka adan pengarap. Realiti pengarap kitai baka tu, lebuh kitai nyadi murid Jesus, kitai disadang belajar ninting hari. Nya alai, badu berundingka diri empu aja lalu nyan regang diri empu tu kebatang iya ngajar kitai nulak sebarang penemu ti mai kitai berunding kitai tau bempu berekat enggau semaya Allah Taala ke kitai ba maya tu, tauka nunda ka gaya peminta kitai - pelajar ari runding baka tu dikereja ninting hari. Nya meh kebuah tu disebut kitai “pengelurus ti datai ulih pengarap” (Rome 4:13). Kitai arapka Allah Taala ti ngereja nya nitihka peneka Iya, ba maya ke udah ditetapka Iya. Lalu nyadi murid beduduk ba tu. 

 Nyangka ba runding Abraham maya nya mutarka penanggul ba pengidup iya kediri empu, tang, utai ti pemadu manah ba cherita Abraham ianya semaya Allah Taala enggau Abraham - semaya ti ditandu sereta dikingatka Allah Taala enggau suah ngagai Abraham empu (Pemungkal 17:1-2). Berekat enggau juluk ati Allah Taala ke orang Kristian ianya Allah Taala seruran deka bebaik enggau semua utai ti ditempa Iya (kelebih agi mensia). Ari tu tadi, udah tentu nitihka Kristus ti udah ngamatka juluk ati sereta bekunsi berekat Allah Taala tu enggau kitai nyadika pemutus ti bepenemu ke kitai Kristian. Lalu pemutus tu enda tau enda digaga kitai ninting hari lalu enggau konsisten. Indah Abraham pen, munyi ku Paul, nemu (persuaded) tauka dipansal ulih penemu alai iya tau arapka Allah Taala aja ti bisi kuasa ngamatka semaya Iya ti baka ke "nadai jalai" ulih dikamatka nya (Rome 4:19-21). Nyadi ba pasal dipansal ngena penemu, baka gaya kitai ngulihka penemu ba dunya tu, kitai ngulihka iya enggau chara ti bebendar belajar sereta konsisten dalam pelajar kitai nya. Kitai semina ulih nyadi murid enti kitai keran deka diajar lalu ransing belajarka pasal Jesus ba sepemanjai pengidup kitai. 

 Sekeda pekara ke tau diperatika ba kebuah kitai tau ngumbai utai nya "nadai jalai" nyadi ba pengidup kitai (aku bejaku ka pasal kitai ti suah ngumbai diri nadai jalai ulih nguing ari dosa sereta tebiat ti jai tauka arapka ba Allah Taala ti idup ti enda ulih dipeda), suah agi laban kitai bisi saru penemu ngumbai utai nya takdir tauka fitrah (atur ti enda ulih diubah). Ngambi ke bagi, baka ukum fizik tauka ukum penempa semua utai (semua utai ti idup deka mati). Tuhan Allah Taala ti ngangauka Abraham ba bacha Penyanggup Lama kitai ke pagi tu Tuhan Allah Taala ti Pemadu Bekuasa (jaku Hebrew, el-shaddai), nya alai Iya enda ulih dibandingka kitai enggau atur adat dunya laban Iya ke numbuh ke atur adat nya. Chara kitai tau meretika pemendar enggau pengamat pasal Allah Taala tu dalam pengidup kitai nadai bukai kelimpah ari ngemaruka runding kitai ninting hari - niun iya enggau pemendar ari Allah Taala, lalu ari nya kitai tau nyeliahka panjuk dunya ti bendar ngasuh kitai nundaka iya (Rome12:2).

 

Nya alai, lebuh Kristus ngangauka bala murid Iya nitihka Iya, kelebih agi ba konteks injil kitai saritu alai Jesus benung nuju ke Jerusalem, nuju pemati Iya empu, Jesus kebatang iya deka sida ngenang tauka ngingatka baru pasal kuasa ti udah diayanka Iya, alai mayuh kali ba pemandang nya, kerja Iya belaban enggau atur adat dunya (ngangkatka orang ari mati, ngasuh orang ti ada buta meda, ngeraika orang ti sakit lan, ngasuh orang ti bajung bejalai, lalu mayuh agi). Taja pen kitai mayuh pengirau ati ba maya tu, awakka kitai mendingka Jesus ti ngangau kitai ngetu enda lama lalu merening ngagai pemesai kuasa Iya (kelebih agi kuasa Iya ti udah ngalahka pemati ngena pemati Iya empu ba kayu regang). Tu semina mujur dikereja enti kitai chakah sereta ransing belajarka Jaku Tuhan - bejalai enggau Allah Taala baka Adam, mensia ti keterubah menya. Siti ari utai ti mujur dikereja Jesus nengah pemati Iya ti enda ulih dikereja orang bukai tauka petara bukai ianya pemati Iya udah mai kitai bebaik baru enggau Allah Taala ti Apai kitai. Kitai enda ulih nyelamatka diri ari pemati ketegal dosa ngena pengering tauka penemu kitai empu tang semina ari pemati Iya ba kayu regang. Arapka pemendar ti balat ngalitka ati tu tau ngujungka kitai tau ditata enggau pengelurus lalu diberi upah nyadi waris semaya Allah Taala ulih pengarap sama enggau Abraham (Rome 4:24).

 Nyadi bakani ku kitai enggau penemu tu deh? Chukup muntang. Kitai idup dalam pengelurus ulih pengarap kitai ba Kristus ti udah nanggam sempekat pengelepas antara kitai enggau Allah Taala Apai chukup sekali aja. Ari penemu tu meh kitai tau meri respons ti ngena baka keran deka ngemasa Allah Taala enggau pengabis ati, runding, pengering, enggau semengat kitai. Kitai mega keran deka rinduka pangan diri laban Allah Taala udah dulu ngayanka pengerindu Iya ba kitai. Indah ba maya kitai ke bisi penyarut enggau pangan diri, kitai deka bebaik laban ba kitai kebendar iya bebatang agi Perintah Allah Taala nya, lalu ukai laya enggau pangan diri ba dunya tu. Lalu aku berunding, enti nyema semua orang ba dunya tu Kristian ti nyadi murid Jesus, dunya tu deka nyadi dunya ti likun sereta penuh enggau pemaik. Nama utai ti nyadi enti kitai matih diri idup dalam pengelurus ulih pengarap ba Jesus maya musin Lent tu? Lebuh kitai meretika enggau bendar nama utai ke dikumbai kitai "idup ulih pengarap", pengelurus kitai deka dipandangka kitai ngelui ari semina atur ugama tauka ngaga diri baka ke bepengarap. Chara kitai idup didunya tu mega deka nyadi untang agi tang chukup ngemuliaka Allah Taala ti Pemadu Bekuasa. Ngambi ke bagi, chara kitai meda gerija enggau atur sembiang gerija ti enda sebaka ba siti-siti endur deka ngelui ari semina suah betanya ka "nama kebuah ngereja tu" tang iya deka nyadi tanya ti munyi tu, "sembiang kitai tu dienjuk kitai nuju Sapa?" Indah tanya baka munyi tu, "nama kebuah iya tu ke nyadi ketuai kitai" enda pansut ari mulut kitai ngapa tang jaku ti munyi tu ke deka pansut "bakani ke Allah Taala tau ngena orang tu ngemuliaka Iya dalam gerija kitai tu". Tu meh chara meda nunda ka gaya perintah Allah Taala.

 Ke penudi, awakka musin Lent tu nyadika musin alai kitai tau ngeluruska baru runding kitai ba utai ti pemadu iya beguna ba kitai; ba Perintah Allah Taala, awakka kitai enda agi mutap ba penusah ti nuntung lalu ngelakka diri majak labuh dalam runding ti nadai daya berari, tang ari nya kitai deka muji Tuhan ke iring Iya ba pengidup alai jalai tu deka mai kitai ngagai pengidup muji ti meruan begulai enggau semua melikat serega enggau orang tuchi. Laban enti ba pengidup didunya tu kitai nulak Kristus, lebuh kitai diguluka bediri ba mua kerusi akim Allah Taala, Iya empu deka nguing ke mua ari kitai ba mua semua raban serega (Mark 8:38).

~Fr. Walter Macdaniel Nakan~