Semaya Allah Taala ti Meruan - Jaku ajar Canon James Juhari

 

Lent 1

Sempekat Lama: Pemungkal 9.8-17

Epistola: 1 Peter 3.18-ujung

Injil: Mark 1.9-15

Jaku Ajar

Awakka aku ngepunka jaku aku enggau sampi Lent 1 ti dikena kitai minggu tu2: “Tuhan Allah ti pemadu bekuasa, Anak Nuan Jesus Kristus udah bepasa empatpuluh hari di menua puang,lalu diuji baka kami mega, tang Iya enda bedosa: berika kami berekat kena nulung kami nagang diri, ngasika Roh Kudus Nuan, lalu baka Nuan ti nemu pengelembut kami baka nya mega kami tau nemu kuasa Nuan ti nyelamat…”

 Dalam Sampi nya tadi kitai ngaku Jesus endang nadai dosa taja Iya kena uji Sitan.  Dalam Sampi nya kitai mega ngaku semua kitai tu ngembuan pengelembut, pengurang enggau dosa.   Dosa kitai mensia ukai semina ngenusahka diriempu aja: dosa kitai mega mai pemerinsa ngagai orang bukai.   3Peratika utai ti nyadi dalam dunya diatu - perang antara Russia enggau Ukraine, perang ti nyadi di Timur Tengah; enggau penyarut politik ti tau numbuhka mayuh agi perang antara menua.   

4Menua kitai nyangka enda beperang enggau menua bukai, tang kitai bisi penyerakang dalam komuniti, genturung pendiau, antara diri sekaban tauka sebilik.  Enti kitai enda charut enggau orang bukai, kitai bisi pengirau pasal diriempu - ba senentang pengerai kitai, ekonomi ruang-bilik tauka penanggul ti enda nemu abis.  Utai tu tau ngasuh kitai ngumbai Tuhan enda ibuhka kitai.   

Tu kebuah aku mai kitai beratika cherita Noah ti udah didinga kitai ba bacha Sempekat Lama tadi (Pemungkal 9: 8-17), lebih agi ayat 12-16.  5Ayat nya nyebut: 12Kena Aku nanda sempekat ti meruan belama iya tu ti digaga Aku enggau nuan, sereta enggau semua utai ti idup, 13Aku ngengkahka anakraja ba remang nyadika kelai kena nandaka sempekat Aku enggau dunya. 14 Genap kali Aku mungkur langit ngena mua hari, lalu anakraja pegari ba remang, 15 Aku deka ingatka sempekat Aku enggau nuan, sereta enggau semua jelu: ai bah enda agi ngerusak semua utai ti idup di dunya tu. 16 Lebuh anakraja nya ayan ba remang, Aku deka meda iya, lalu ingatka sempekat ti meruan belama iya tu entara Aku enggau semua utai ti idup di dunya tu.”

Hari Minggu tu tadi aku bisi nyebut jaku tu: 6“Jaku ti diberi Tuhan ngagai kitai dalam pemedis enggau penusah sama sebaka enggau jaku diberi Iya maya kitai nyamai-lantang.  Jaku Tuhan tetap meruan sereta enda berubah, enda ngira nama utai ti nyadi dalam pengidup kitai”.   Aku ngulangka jaku nya seharitu - Tuhan tetap ngamaika semaya Iya, enda ngira sekalika semaya nya digaga beribu taun ti udah tauka baru diatu.  

Bup Kudus ngembuan mayuh cherita ti alai Tuhan ngaga sempekat enggau orang Israel.  7Iya ngaga sempekat enggau Abraham (Pemungkal 17:4) enggau Moses (Pemansut 34:10).  Sempekat nya semaya ti digaga antara dua bengkah raban. Sekeda sempekat bisi atur ti udah dipesetuju sereta mesti dititih. Enti atur sempekat nya dilanggar, sempekat nya dikira putus.  Sebansa agi sempekat nadai atur (tauka syarat) tang iya tetap.  Tu bansa sempekat ti digaga Allah Taala enggau Noah: sempekat ti tetap, digaga lalu ditentuka Allah Taala.  Lalu tanda sempekat antara Noah enggau Tuhan nya anakraja.   

8Bisi dua iti pekara deka disebut aku ditu pasal sempekat antara Allah Taala enggau Noah tu.  Ba ayat 13 Tuhan nyebut: “Aku ngengkahka anakraja ba remang nyadika kelai kena nandaka sempekat Aku enggau dunya”.  Nya ukai reti sebedau tu, anakraja nadai kala pengari di langit. Anankraja nya endang lama udah bisi, tang tu terubah iya Tuhan ngena iya nyadika tanda sempekat Iya enggau mensia - sempekat Iya enda agi ngena ai bah kena Iya ngerusak semua utai ti idup di dunya tu.

Kedua, lebuh Tuhan nyebut “Aku deka…ingatka sempekat ti meruan belama iya tu…” nya ukai reti bisi maya Tuhan ingat, bisi maya Iya enda ingat.  Allah Taala kitai ti nemu semua utai mega ingatka semua utai.     

Nama kebuah Tuhan ngena anakraja nyadika tanda sempekat?   Dalam Bup Kudus, anakraja bisi kaul enggau mulia Allah Taala.   9Nabi Esekiel ba bagi 1, nusuika pasal diri bisi genera meda mulia Allah Taala, lalu ba ayat 28 iya nulis munyi tu: “Penampak nya baka gaya anakraja ti ba mua hari lebuh hari ujan. Nya meh gaya mulia TUHAN.  10Ba Pemandang 4:3 & 10.1 John mega madahka mulia Allah Taala ti dipeda iya ba genera, pegari baka anakraja.  11Lalu ba pengujung surat iya, John nulis munyi tu, “Lalu nengeri nya enda begunaka mata hari tauka bulan manchar ngagai iya, laban mulia Allah Taala manchar ngagai iya, lalu Anak Domba nyadika lampu iya. 24 Semua bansa deka bejalai dalam penampak nya, lalu bala raja dunya deka mai mulia sida ngagai nengeri nya…” (Pemandang 21:23-24)

12Kedua, kitai enda kala meda anakraja ayan maya hari panas terit.  Anakraja ayan di langit maya ujan beris-beris enggau lebuh matahari manchar, udah abis kabut, guntur enggau kilat.  

13Anakraja ngingatka kitai pengaga enggau pengelantang semina ulih diasaika udah kitai tembu ngereja pengawa ti berat tauka dilepaska ari penusah enggau pemedis.  Hari Minggu tu tadi aku madahka Jesus angkat idup dalam mulia laban Iya besedia nyerahka nyawa diri mati ba kayu regang.  Enti Jesus enda merinsa ba regang lalu mati, Jesus mega enda angkat idup baru dalam mula; lalu kitai mega enda bulih pengelepas.    Nya kebuah Tuhan kadang-kadang baka ti enda ibuhka kitai, tang nejuka kitai kediri nempuh kabut dalam pengidup. Tuhan kadang-kadang ngasuh kitai ngasaika pemedis awaka kitai belajar ari utai ti diasai kitai, lalu mansang dalam pengidup.  Enti kitai selalu lari ari tanggung-pengawa diri, lalu ngiga utai ti mudah, kitai enda ulih ngasaika berekat Tuhan ti bendar.  

14Ketiga, anakraja ulih dipeda kitai ba sebarang endur di serata dunya tu, udah abis ujan, kabut enggau biaubalai.  Nya ngayanka ngagai kitai pasal pemesai pengerindu enggau pengasih Tuhan.  Sempekat Tuhan mungkur semua mensia ba dini alai sida diau, lalu sempekat nya tetap sereta meruan. Reti nya sempekat nya enda bepanggai ba tebiat enggau ulah kitai mensia ti selalu berubah, tang bepanggai ba pengerindu enggau pengasih Tuhan ti tetap.  Anakraja ba langit ingatka kitai pasal sempekat tu.  

Bisi siti agi kebuah Tuhan ngena anakraja nyadika tanda sempekat Iya enggau mensia.  15Anakraja nya penampak ti dipechahka ngagai 7 macham chura, lebuh iya manchar ba teritik ujan ti labuh ari langit.  16Tujuh iti chura, (mirah, banda, kuning, gadung, biru, biru tuai, ungu) nyadika tanda kena ngayanka penyerakup, kaul, pengerindu, antara kitai mensia ti lain perangai, runding, enggau penemu enggau pangan diri. Anakraja ti datai ari ai ujan enggau penampak matahari bejakuka pasal pengidup kitai ti bechampur penyamai enggau penusah, pengerai enggau penyakit, pemisi enggau penyuntuk, pengaga enggau penyinu.  17Anakraja ngingatka kitai, lebuh orang ti kering ngangkatka orang ti lembut; lebuh orang ti lantang nyaup orang ti tusah; kitai meda pengerindu enggau pengasih Tuhan bekereja dalam komuniti kitai.   

Anakraja ti ba langit ukai semina semaya Allah Taala ti madahka Diri enda agi ngasuh ai bah ngerusak semua utai ti idup di dunya tu.  Iya mega ngingatka kitai pasal kitai ti dibaptisa dalam ai, ti diselamatka dalam nama Kristus, lalu nerima semaya pengidup meruan.   18Lebuh kitai dibaptisa dalam ai, kitai digempuru nyadi kaban dalam siti ruang bilik ti beapaika Allah Taala.  191 Peter 3: 18-21 nerangka iya munyi tu: “maya Noah menya, lebuh bandung benung digaga, ti alai semina mimit aja orang - lapan iku aja semua sida - diselamatka ulih ai.  21 Ai nya ngambarka pemaptisa ti nyelamatka kita diatu”.

Sempekat ti digaga Allah Taala tu mega ukai semina enggau Noah sebilik aja, tang nyengkaum semua turun-menurun iya enggau tiap iku utai ti idup di dunya tu.  Sempekat tu ngayanka pengerindu Allah Taala ke semua utai ti udah digaga Iya.  Anakraja ngingatka kitai pasal tanggung pengawa ti udah diberi Tuhan ngagai kitai ba 20Pemungkal 1:26 & 27: Udah nya Allah Taala bejaku, “Aram Kitai ngaga mensia neladan gamal Kitai Empu, baka gamal Kitai Empu; lalu awakka sida bekuasa atas ikan, burung, enggau semua jelu di dunya tu, enggau semua utai ti ngerayap ba tanah…  28 Allah Taala merekatka sida, lalu bejaku ngagai sida, “Beranak betelesak lalu ngemenuhka dunya meh kita sereta bekuasa atas iya; perintah meh ikan, burung, enggau semua utai ti idup di dunya.”

Tuhan ngasuh kitai ngena enggau makai utai ti udah digaga Iya, lalu kitai mega diberi tanggung pengawa nyadi pengibun utai ti digaga Tuhan.  Penanggul iya, mensia enda tepantup ati ngena enggau ngulih asil ari tanah enggau tasik; kitai ngerusak kandang menua ti alai kitai diau. Kampung galau (forest reserve enggau water catchment area) pen diperimba sekeda kitai. Sekeda orang enda tepantup ati ngulihka ikan di sungai ngena ginti enggau jala; sida nuang rachun dalam sungai.  Kitai bukai ti ngirup ai ari sungai nya pen sama ngirup rachun.

Anakraja ti ayan di langit ningatka kitai sempekat Tuhan enggau kitai.  Iya mega ngingatka kitai pasal tanggung pengawa kitai: ngibun menua ti alai kitai diau tu enggau naka ulih kitai.   

22Kena ngujungka jaku aku, ingatka sempekat Tuhan enggau Noah, semua peturun iya enggau semua utai idup nya sempekat ti meruan. Ba ayat 16 Tuhan nyebut: “Lebuh anakraja nya ayan ba remang, Aku deka meda iya, lalu ingatka sempekat ti meruan belama iya tu entara Aku enggau semua utai ti idup di dunya tu. 17 Nya meh kelai sempekat ti digaga Aku enggau semua utai ti idup di dunya tu.”

Sempekat tu agi dikena datai ke sehari tu. Sempekat Baru ti digaga Allah Taala enggau mensia nengah Jesus Kristus enda ngubah sempekat lama enggau Noah.  Kedua-dua sempekat tu besangkut-paut enggau pangan diri.  Pengarap kitai ba Jesus netapka kitai diselamatka lalu ulih tama perintah serega.  Sempekat Tuhan enggau Noah nentuka kitai ti agi idup di dunya tu semampai dalam ibun Tuhan. Iya mega ngingatka kitai pasal tanggung pengawa kitai ngagai bala anak-uchu kitai ti nampung kitai. Sida ukai semina begunaka pemansang ekonomi enggau infrastruktur; sida mega beguna ai enggau angin ti beresi enggau tanah ti ami, ti agi ulih mansutka asil.  

Orang ti enda arapka Allah Taala meda anakraja ba langit baka pekara biasa; tang ba kitai ti arapka Tuhan, anakraja nya tanda pengasih enggau pengerindu Iya ke kitai.   

 

~Can. James Juhari~