Allah Apai ti Rindu - Jaku ajar Canon James Juhari

Lent 4 (10 March 2024)

Bacha Sempekat Lama: Penyampau 21.4-9

Bacha Epistola: Epesus 2.1-10

Bacha Injil: John 3.14-21

 JAKU AJAR

2“Laban Allah Taala balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya.” (John 3: 16).

Bacha kitai sehari tu diambi ari randau antara Jesus seduai Nikodemus, siku orang parisi ti nemuai ngagai Jesus malam hari. 3Nikodemus betemu enggau Jesus, laban ba penemu iya, Jesus enda ulih ngereja semua utai ti udah dikereja Iya, enti Iya ukai ari Allah Taala. Tang ari batang randau seduai iya, Nikodemus agi bisi utai ti ngasuh iya kakang ati pasal Jesus. 4Pengakang ati iya pansut lebuh Jesus nyebut, “Enggau bendar Aku madah ngagai nuan, nadai orang ulih meda Perintah Allah Taala enti iya enda diadaka baru”. Ba Nikodemus saut Jesus nya ukai semina kelalu mudah tang enda masuk akal. Iya nanya, “Baka ni ku orang ulih diadaka baru lebuh iya udah besai tuai?” Lalu ku Jesus nyaut: “Enggau bendar Aku madah ngagai nuan, nadai orang ulih tama ngagai Perintah Allah Taala enti iya enda diadaka ulih ai enggau Roh Kudus”. Jesus bejakuka pasal baptisa ngena ai, lalu udah nya Roh Kudus Allah Taala bekereja dalam kitai. Nya kelalu mudah ba Nikodemus. Laban ba penemu iya, penama ngagai perintah serega ukai pekara ti mudah laban iya bekaul enggau ngasika Adat Allah Taala. Lalu semua nya bepanggai ba peneka, pengerajin enggau pengulih mensia. 

Penanggul Nikodemus nya penanggul ti nuntung mayuh bendar orang ari kelia menya dataika seharitu. 5Mayuh arapka Allah Taala nya Pengaga semua utai, tang agi nyembah utai ti digaga Allah Taala. Mayuh orang madahka Allah Taala nya Petara ti pemadu bekuasa. Tang sida enda arapka Allah Taala ulih ada ke dalam dunya, nyadi mensia. Nikodemus arapka Allah Taala ti pemadu bekuasa tang lebuh Jesus bejakuka pasal orang ti diadaka ulih ai enggau Roh Kudus tama ngagai perintah serega, Nikodemus nanya, 6“Baka ni ku utai tu tau nyadi?” (ayat 5-6).   

Semua kitai udah bisi penemu (betul tauka salah) pasal Allah Taala. Nya alai, lebuh kitai ninga penemu baru pasal Tuhan, kitai mega nanya munyi Nikodemus. Orang tau nanya baka ni Allah Taala ti siku tau nyadi Apai, Anak enggau Roh Kudus? Bisi orang nanya: Enti Allah Taala nya Tuhan ti pemadu bekuasa, nama kebuah Iya ngasuh Jesus mati merinsa ba kayu regang? Nama kebuah Tuhan enda ngena chara ti mudah agi, ti enda pedis? Enti Tuhan amat rinduka aku, nama kebuah Iya enda nyaut sampi aku?  

Kitai mensia enda ulih nemu semua utai pasal Allah Taala, tang kitai agi ulih nemu pasal Iya laban Jesus ngayanka Iya ngagai kitai. 7Tu utai disebut Jesus ba Matthew 11:27 “Semua utai udah diberi Apai ngagai Aku. Nadai orang ngelala Anak, semina Apai aja, lalu nadai orang ngelala Apai, semina Anak aja, enggau orang ke dipilih Anak alai Iya mandangka Apai”.

Reti nya sebarang ajar tauka penemu pasal Allah Taala ti ukai dipansut tauka ditetapka Jesus, nya semina utai sangka kitai ngapa. 

8Aku mai kitai beratika ayat 16: “Laban Allah Taala balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya.”  Ayat tu bejakuka pasal Allah Taala ti penuh pengerindu, lalu udah dikumbai orang ayat ti pemadu besai reti dalam Bup Kudus. Tang nama reti iya? 

9Terubah iya, ayat tu madahka ngagai kitai pengawa ti nyelamatka semengat mensia berengkah ari Allah Taala magang. Ajar tu lain ari ajar pengarap bukai, ti madahka kitai mesti ngereja tu-nya dikena ngulihka ati Tuhan. Nitihka ajar pengarap bansa tu, kitai deka nerima pengampun Tuhan kitai mesti bepasa, besembiang berapa kali sehari, meri sedekah, begenselan ngena darah jelu, ngenjuk piring, ngintu adat penti-pemali, sereta enda makai utai ti dikumbai mali. Nitihka ajar tu, enti kitai ngasika adat ti udah diletak, kitai dilepaska ari pengeringat Tuhan lalu bulih selamat. Tang Tuhan ti diajar Jesus ngagai kitai ukai Tuhan ti pengeringat tang penuh pengerindu enggau pengasih ke kitai. Tang Tuhan mega lurus sereta kudus, lalu enggai meda kitai idup dalam dosa. Nya kebuah Iya nganjung Jesus nganjung Anak Iya ke dunya tu.  

10Kedua, ayat tu bejakuka pasal pengerindu Allah Taala. Allah Taala kitai ukai Tuhan ti begigaka penyalah kitai awakka nyadika peluang endur ngukum kitai. Tang kitai diau dalam menua ti alai pengarap ba Tuhan suah dikaulka enggau adat sereta ukum. Enti nuan ngelanggar adat, nuan kena ukum. Lalu ukum tu selalu diletak, ukai dikena ngasuh orang rinduka sereta bebasaka Tuhan, tang laban penyalah ti dikereja kitai dikira ngenyai pemanah nama agama tauka ngemaluka orang ti sama pengarap enggau kitai. Lalu ukum dalam nama Tuhan tu siti chara ti tau dikena tuai-tuai pengarap ngemeranka kuasa sida atas orang ti ari baruh sida. Lalu lebuh pengarap nyadi bansa tu, iya tau nagang orang ngelala tauka ngasaika pengerindu Tuhan. Nya kebuah kitai mesti bepegai ba ajar pasal pengerindu Tuhan ti diajar Tuhan Jesus.  

11Ketiga, ayat tu ngajar kitai pasal pemesai pengerindu Tuhan ke kitai. Tuhan rinduka dunya - ukai naka rinduka sebengkah menua tauka bansa; ukai semina rinduka orang ti arapka Iya, tauka orang ti manah aja. Allah Taala rinduka dunya; nyengkaum orang ti manah enggau ti jai; orang ti lurus enggau orang ti bedosa; orang ti talukka Tuhan enggau sida ti enda ngelala Tuhan.   

Lalu pengerindu tu semina ulih dikelala sereta diasaika kitai dalam kaul kitai enggau Jesus. Nya kebuah kitai arapka Jesus. Tu diterangka John 3:14-21. 12Kitai meda ayat 15 enggau 16 dulu: “Baka Moses ke nuatka ular temaga di menua puang, baka nya meh Anak Mensia deka dituatka, ngambika barang sapa arapka Iya bulih pengidup ti meruan belama iya”.

Tang nama reti ayat tu?  

Bacha Sempekat kitai sehari tu (Penyampau 21: 4-9) madahka bansa Israel ti mut-mut ngelaban ketegal penusah idup di menua puang - enda chukup ai enggau utai empa. Sida madahka diri nyau leju makai mana ti diberi Tuhan tiap hari. Laban sida enda nemu beterima kasih ke pengerindu Tuhan enggau ke pengiruh Iya ngintu sida sepengelama sida ti diau di menua puang. Nya alai Tuhan ngukum sida; lalu ngasuh ular bisa mantuk sida ngujungka mayuh sida ti kena pantuk ular nya mati. Tang udah orang mayuh ngaku diri bedosa laban udah bejaku ngelaban TUHAN enggau ngelaban Moses, lalu ngasuh iya besampi “ngagai TUHAN minta Iya muai ular nya; 13TUHAN lalu ngasuh Moses ngaga siku ular ari temaga, lalu nuatka ular nya ngena siti tiang; barang sapa kena pantuk ular, deka merening ngagai ular nya, lalu gerai”.   

14Bisi dua iti pekara dibai aku perati kita ditu: Kesatu, orang Israel udah bedosa lalu ketegal dosa nya sida diukum. Kedua, Tuhan enda muai ukum nya tang merika sida peluang dilepaska ari ukum nya. Barang sapa dipantuk ular, ti merening ngagai ular temaga ti udah dituatka Moses atas munggu, iya deka digeraika.  Tuhan enda mejal sida digeraika, tang ngasuh sida milih: enti enggai mati udah kena pantuk ular, sida tau malik ngagai ular temaga ti dituat ba atas munggu nya, lalu sida deka selamat.    

Dosa ti nyadi dalam dunya tu tebal agi datai ari kitai empu laban kitai ti milih deka ngereja iya. Tang kadang-kadang kitai tau kena tinggang penusah ti datai ari dosa orang bukai. Dosa mesti diukum, tang lebuh Allah Taala ngukum kitai, Iya agi ngereja nya dalam pengerindu, baka Iya ti ngukum Adam seduai Awa (bacha Pemungkal 3:21). Paul, ba Rome 5:6-8 nerangka 15iya munyi tu: “6Laban lebuh kitai agi lemi, ba maya ti patut, Kristus mati ke orang ke jai. 7Iya ti bendar, jarang orang deka mati ngarika orang ke lurus. Nyangka orang berani mati ngarika orang ke manah. 8Tang Allah Taala udah ngayanka pengerindu Iya ke kitai, iya nya lebuh kitai agi nyadi orang ke bedosa, Kristus mati ngarika kitai!

Bup Penyampau madahka pengelepas endang disediaka orang Israel, enda ngira ni penyuah enggau ni maya sida kena pantuk ular. Enti sida malik ngagai ular temaga ti dituatka Moses ba tuchung munggu, sida deka selamat. Baka nya meh pengerindu Tuhan ngagai kitai ke diatu: iya enda berubah, sereta enda ngira ni pemalat penyai kitai: sebarang orang ti nguingka diri ngagai Jesus lalu arapka Iya deka selamat.   

16John 3: 16-17 nyebut munyi tu: “Laban Allah Taala balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya. Laban Allah Taala ukai ngirumka Anak Iya ngagai dunya ngambika Iya ngakim dunya, tang ngambika Iya nyelamatka dunya”. Ayat tu madahka Jesus aja ti ulih nyelamat kitai. Tu enda masuk akal ba Nikodemus. Ba penemu iya, kitai mensia masin-masin nyelamat diriempu: enti kitai ngasika semua adat Allah Taala lalu meri genselan darah jelu tiap kali kitai bedosa, kitai selamat.    

Tang nya chara ti sementara aja ti diungkupka orang Israel. Tuhan ukai semina deka nyelamat orang Israel aja tang bansa bukai mega. Lalu dikena Iya nyelamat semua mensia, Allah Taala nganjung Anak Tunggal, Jesus Kristus nyadika Pengelepas. Lalu Iya milih bansa Israel nyadika bansa dikena Iya mereka semua bansa di dunya tu. Nya kebuah kitai macha “sejarah” pengidup, politik enggau pejalai bansa Israel dalam Bup Kudus. 17Bisi orang nanya: Baka ni enti orang nya enda arapka Tuhan Jesus? Baka ni sida tau bulih selamat? Enda bedosa, lalu idup dalam pengelurus. Tauka enti kitai selalu bedosa, kitai nerima pengampun ti diberi Allah Taala nengah Jesus.   

18Jesus datai ke dunya tu ukai deka ngakim dunya; tang deka meri penampak ngagai mensia. Tang enti mensia nulak penampak nya, sida deka nerima ukum. Tu disebut ba ayat 18 ngagai 21: 18Orang ke arapka Iya enda diukum; tang orang ke enda arap, endang udah diukum, laban sida enda arapka nama Anak Tunggal Allah Taala. 19 Baka tu ku ukum dipejalaika: penampak udah datai ngagai dunya…orang ke ngereja utai ti bendar, datai ngagai penampak, ngambika pengawa ti dikereja sida nyata nitihka peneka Allah Taala”. 

 19Lalu penampak tu deka ngereja dua iti utai: iya deka ngayanka pemanah orang ti lurus lalu mungkar penyai orang ti bedosa. Tu kebuah kitai ngintu Krismas, Good Friday enggau Ista. Hari Krismas endur kitai ngelaluka Penampak ti datai ngagai dunya lebuh Tuhan Jesus diada. Good Friday hari endur kitai ngingatka Pemati Jesus ba kayu regang dikena nebus dosa mensia. Hari Ista endur kitai berami meri puji ngagai Tuhan laban pemati Jesus muka jalai ngagai pengidup ti meruan.  

20Jaku penutup: Mensia di luar din mayuh enda nemu pasal pemendar tu. Sida agi nyangka diri ulih tama serega enti sida ngasika adat, enti sida bebendar agi besembiang, enti sida muai dosa ngena darah jelu. Sida enda nemu pasal Jesus ti udah meri nyawa diri mati ba kayu regang awakka mensia ditebuska ari dosa. Ukai sida ti di luar din aja ti enda nemu. Kitai ti udah nyadi orang Kristian pen tau enda ingatka pasal pemesai pengerindu Tuhan ke kitai. Kadang-kadang dalam penusah, kitai tau ngasaika Tuhan udah ngejangka diri lalu agi enda ibuhka kitai. Tang iya ti bendar, pengerindu Tuhan baka matahari. Matahari tetap manchar siang tauka malam; lebuh langit terang tauka ditutup muari tebal. Pengerindu Tuhan meruan sebaka, enda ngira nama utai ti nyadi dalam pengidup kitai siku-siku. Injil kitai sehari tu ngajar kitai - penampak bekuasa agi ari pemetang; ati ti rindu tegap agi ari ati ti begedi; lalu pengidup meruan di serega lebih agi beguna ari pengidup ti sementara di dunya tu. 

~Can. James Juhari~