Ngenjuk Sembah ti Bendar ngagai Allah Taala - Jaku Ajar Canon James Juhari (Lent 3)

 Sermon (ST. Thomas Church, Bintulu)

Lent 3 (3 March 2024)

Sempekat Lama: Pemansut 20.1-17

Epistola: 1 Korint 1.18-25

Injil: John 2.13-22

Jaku ajar

Aku deka ngepunka jaku aku pasal Injil ti udah dibacha kitai tadi enggau “sejarah” sembiang bansa Israel.  

Gawai Paska diintu orang Israel dikena ngingatka aki-ini sida kelia ti dilepaska ari menua Ejip (Pemansut 12).  Malam sebedau sida pansut ari menua Ejip, Tuhan udah ngasuh orang Israel munuh bedus tauka kambin lalu darah kambin nya ti dipalit ba alang pintu enggau ba dua iti tiang pintu.  Moses nerangka kebuah iya munyi tu: “Laban TUHAN deka mansa lalu munuh orang Ejip; lalu lebuh Iya meda darah ba alang pintu enggau ba dua iti tiang pintu, Iya deka ngelaungka mua pintu nya, lalu enda nyagi Melikat Pemati tama ngagai rumah kita, enggai ke iya munuh kita”. (Pemansut 12: 23).  Gawai Paska tu dikena ngingatka orang Israel di Ejip ti diselamatka ari penusah maya Melikat Pemati ti mansa mua pintu rumah sida.   Lalu pengerami tu ditangkanka enggau Gawai Roti ti Enda Beragi, ti diintu sepengelama seminggu.  

Semua orang lelaki ti beumur 12 taun ke atas mesti ngulu’ pengerami tu. Tiap taun beratus ribu iku orang ari mayuh bengkah menua deka datai ngagai Jerusalem lebuh maya Gawai tu.    Kena hari ke-10 dalam Bulan Nisan (bulan March & April), siku bedus lelaki umur setaun, ti nadai penimpang deka dibai ngagai Jerusalem.  Kena hari ke-14, urung pukul 3 lemai iya deka dibunuh ke genselan kena muai dosa.   

Rumah Sembiang ti alai sida begempuru digaga Raja Herod kira 46 taun udah.  Herod ngaga rumah sembiang nya ukai laban iya arapka Tuhan, tang dikena iya ngulihka sukung rayat Israel enggau nanka kuasa.     

Rumah sembiang nya mungkur kandang endur kira 26 ekar pemesai.  Ba tengah-tengah nya bilik ti dikumbai “Endur ti Pemadu Kudus”.   Rumah sembiang nya dikelingi empat iti kandang endur alai orang besembiang: iya ti terubah diungkupka bala imam aja; iya ti kedua ti ungkupka orang lelaki bansa Israel; ketiga diungkupka orang indu; lalu iya ti ba luar sekali (ti kira 14 ekar pemesai) diungkupka orang bansa bukai enggau endur orang berandau.  

Orang bansa bukai enda ulih tama ke dalam Rumah Sembiang.  Sida semina tau besembiang ba luar. Tang penanggul iya tempat nya udah penuh laban orang ti bejual enggau bebelika jelu enggau burung achang ti dikena ke genselan, enggau orang ti betukarka duit kena mayar chukai.

Tuju sida ngasuh orang ti bejualka jelu enggau burung enggau nukar duit ba rumah sembiang nya manah. Bisi dua kebuah: terubah iya. awakka orang ti datai ari jauh enda kiruh mai jelu ti deka dibunuh.  Utai ti diguna sida udah disediaka magang dia.    

Kedua, tiap orang lelaki bansa Israel enggau orang bansa bukai ti datai mesti mayar pupu setengah Shekel (duit pirak Israel kira 7 gram pemerat).  Orang ti datai ngagai rumah sembiang mai duit ari menua diri, ti enda ulih diterima Rumah Sembiang laban duit nya bisi gamal pala raja tauka gamal petara.  Nya alai sida mesti nukar duit nya dulu ngagai Shekel sebedau mayar chukai.   

Dulu menya, tempat endur orang bejualka bedus, kambin enggau burung achang, enggau nukar duit tu ba luar Rumah Sembiang. Pengawa dalam Rumah Sembiang semina diungkupka endur orang besembiang, berandau, bejurai tauka belajar pasal pengarap. (Enti kitai macha Luke 2:41-50, pasal lebuh Jesus baru beumur 12 taun, ti kena tinggal Maria seduai Josep ba Rumah Sembiang.  Udah seduai nikal baru ngagai Jerusalem, seduai iya “tetemuka Iya dalam Rumah Sembiang, duduk berandau enggau bala pengajar”).  Udah nya sida dikemendarka pindah ke dalam lalu ngalahka tempat alai orang bansa bukai besembiang. Tuai Imam maya nya Annas, lalu Annas tu dituduhka orang bisi pekat enggau orang ti bedagang dia.  Nya kebuah sekeda orang ngumbai Rumah Sembiang nya “Pasar Annas”.   

Pengawa sida ti bejual dia ukai semina ngachau orang ti deka besembiang.  Pengawa sida ti bejual pen nyadi enda betul.  Sida nyau nemu ngelakar orang ti datai besembiang. Sida ti endur orang nukar duit minta “komisen” lebih ari ti patut.  Maya nya Tuai Imam ba Rumah Sembiang nya Annas, lalu Annas enggau bala imam iya udah sama bepekat enggau orang ti bejual.  Enti orang mai jelu ari rumah tauka meli iya ari pasar di luar (laban nya murah agi), sida imam tu tau begigaka penyalah ti alai jelu tauka burung achang nya enda tau dikena nyadika genselan. Enggai enda enggai, orang ti besembiang mesti meli jelu enggau burung ari sida enggau rega ti mar agi.  Kelimpah ari tempat endur sembiang enggau belajar nya digaga nyadika pasar, orang mayuh mega ngena iya nyadika jalai endur pansut enggau tama nengeri Jerusalem.  Siti ari pintu kota Jerusalem (Golden Gate) endang ba endur tempat sembiang nya, lalu iya nyadi jalai mintas kena orang berangkutka barang pansut tauka tama Jerusalem.     

Tu nadai nyadika penanggul ba orang Israel laban sida besembiang di dalam. Orang bansa bukai nadai chara bukai, tang besembiang bebalut enggau orang ti bejual-bebeli dia.  Nya ti ngasuh Jesus ringat.      

Aku bejakuka pekara tu ukai deka mantah chara orang Israel besembiang.  Iya mega ngingatka chara kitai empu besembiang.  Enti orang Israel udah ngaga salah, kati kitai enda nemu salah ba chara kitai nyembah?  Enti ketegal deka ngemudahka utai ngasuh orang Israel ngereja utai ti salah, nama pengawa ti dikereja kitai ti ngasuh kitai salah ba mata Tuhan?  Enti atur ti digaga sida tuai pengarap orang Israel ngenusahka orang bansa bukai ti deka besembiang, nama utai ti dikereja kitai ti tau nagang orang bukai datai ngagai Tuhan?    Enti orang baka Imam Annas ulih beambi untung ari pengarap, bisika enda kitai ngena gerija dikena nguntung diri empu?  

Pekara ti terubah sereta pemadu beguna dipelajarka kitai ari cherita tu iya nya Allah Taala ti disembah kitai nya Allah Taala ti kudus.  Lalu Rumah Sembiang Tuhan mega rumah kudus, enda ngira sekalika iya dikena maya jeman Sempekat Lama kelia tauka gerija ti dikena kitai diatu.   Jeman Moses kelia orang nyembah Tuhan ba langkau kain.  Pemansut 40:34-35 nusui utai ti nyadi munyi tu: 34 Udah nya mua hari lalu mungkur Langkau Kain TUHAN, lalu mulia TUHAN ngisi endur nya.  35 Lalu Moses enda ulih tama ngagai Langkau Kain TUHAN, laban mua hari nya diau ba atas Langkau Kain nya, lalu mulia TUHAN ngemenuhka langkau sembiang.”

Udah nya Raja Solomon nirika Rumah Sembiang ti terubah.  Iya tembu digaga dalam taun 957 BC  (sebedau Tuhan Jesus ada).  Rumah Sembiang nya bediri kira 400 taun, sebedau iya dirubuh Raja Nebukadnessar ari Babilon lebuh iya nyerang nengeri Jerusalem dalam taun 586 BC.  Allah Taala nejuka Raja Nebukadnessar nyerang Jerusalem lalu ngerusak Rumah Sembiang laban Tuai bansa enggau rayat Israel bedosa ngelaban Iya.  Tu disebut ba Jeremiah 23:11: Ku TUHAN bejaku, “Sida nabi enggau sida imam endang enda nangika Allah Taala. Aku udah tepedaka sida ngereja penyai dalam Rumah Sembiang”. 

Rumah Sembiang ti kedua digaga Raja Herod dalam taun 20 BC.  Ba Mark 13:2, Jesus mega bejaku madahka Rumah Sembiang nya deka dirubuh udah siku ari murid Iya muji pemanah Rumah Sembiang nya. Ku Jesus. “Kati nuan bisi meda rumah ti besai nya? Sigi pen nadai meh batu nya deka mengkang betusun baka nya. Semua batu nya deka diruntuhka magang.”  Udah rayat Israel angkat ngelaban perintah Rome, raja Rome lalu nganjung sedadu iya nyerang Jerusalem; lalu dalam taun 70 AD Rumah Sembiang nya dirubuh.   Antara taun 685 enggau 691 AD Kaliph Abdal Malik nirika sebuah “mashhad” endur orang Islam meri basa enggau sembah, lalu iya agi dia dataika sehari tu.   

Kitai Kristian, enda agi begunaka Langkau Kain enggau Rumah Sembiang baka ti di Jerusalem.   Nya utai ti udah lepas. Tang Tuhan agi bisi rumah sembiang di dunya tu.  Ba 1 Korint 3:16-17, Paul bejakuka pasal rumah sembiang nya munyi tu: “Kati kita enda nemu diri rumah Allah Taala, lalu Roh Allah Taala diau dalam kita?  Enti orang ngerusak rumah Allah Taala, Allah Taala deka ngerusak orang nya. Laban rumah Allah Taala kudus, lalu kita nya rumah Allah Taala”.   Lalu ba 1 Korint 6:19-20 iya nulis, “Kati kita enda nemu, tubuh kita nya rumah Roh Kudus, ke diau dalam kita, ke udah diberi Allah Taala ngagai kita? Kita ukai enggi kita empu.  Laban kita udah dibeli ngena rega ti besai. Nya alai, kena meh tubuh kita ngemuliaka Allah Taala”.

Kitai dikumbai “rumah sembiang kudus” ukai laban kitai manah pendiau tauka ulah: tang laban Roh Kudus diau dalam kitai ti arap.  Taja Roh Kudus diau dalam kitai, Iya enda mejal kitai ngereja utai ti lurus.  Lalu laban kitai diau dalam dunya ti mayuh penguji enggau dosa, nya alai kitai suah agi kitai ngereja utai ti salah ari utai ti betul.  Nya kebuah tiap kali kitai besembiang ba gerija, kitai ngaku dosa diri.  Tuhan ti rinduka kitai besedia ngampun dosa kitai, awakka kitai dituchi lalu endur alai Roh Kudus diau.  

Kedua, sembah nya pengawa ti berat sereta berega. Ba 1 Bansa Israel 21: 18-30, kitai ninga pasal Tuhan ti deka ngukum David laban iya udah bedosa, tang David minta kasih.  Lalu Tuhan ngasuh iya ngaga siti alta endur ngenjuk piring kena muai dosa.  Tempat ti dipilih Tuhan nya ba tanah alai Araunah ngindik gandum. Terubah iya Araunah deka meri enggau pechuma, tanah iya enggau sapi ti deka ditunu nyadi piring.  Tang David nyaut, “Enda tau baka nya. Aku enda tau enda mayar semua rega utai nya ngagai nuan. Aku enggai meri utai nuan nyadika piring ngagai TUHAN, enti utai nya ukai utai ti dibeli aku empu.”  David lalu mayar Araunah enam ratus singkap duit emas kena meli endur ti alai ngindik gandum nya.

Sembiang ti diberi kitai mesti berega.  Pengawa nyembah tu ukai semina maya kitai bejaku enggau belagu: lebuh kitai meri duit, kitai mega meri sembah ngagai Tuhan.  Tang aku enggai madah ni penyampau pemeri ti patut diberi kita, laban nya antara kita enggau Tuhan.  Tu utai ti patut dikingatka kita lebuh meri: ayanka pengerindu nuan ke Tuhan ngena pemeri nuan ke Iya.

Ketiga, aku deka bejakuka baka ni kitai patut ngintu rumah sembiang kitai.  Aku suah ninga orang Kristian bekelikuhka pasal adat, atur, enggau chara besembiang; nyengkaum nama perengka ti tau enggau enda tau dikena.  Sekeda orang madah laban Jesus muru orang bejual ba rumah sembiang, nya alai kitai enda tau ngatur pengawa bejual ba gerija.

Tang nya ukai utai ti diajar dalam bacha Injil tadi.  Kitai mesti masa tempat ti alai kitai besembiang laban dia endur kitai meri puji enggau basa ngagai Tuhan.  Penanggul iya, kitai tau lebih agi kiruhka tempat, atur-chara, tradisi tauka adat gerija, ari kitai ti beratika pengelurus semengat (ati enggau runding) kitai empu.  Tempat enggau atur ti dikena kitai besembiang semina sementara aja, lalu nemu pindah tauka berubah.  Tang semengat kitai deka tetap sereta meruan, lalu nya ti dikira Tuhan beguna agi ari utai bukai.  

Utai ti ku aku iya nya, lebuh kitai ngaga atur tauka perambu, tauka mansutka jaku dalam gerija, kitai mesti bejimat - laban utai nya tau ngangkat tauka nekul pemansang gerija.  Pemutus ti digaga kitai tau meransang tauka nagang orang datai besembiang.  Aku ukai madahka kitai tu betanggung-jawap ba gaya ulah orang bukai. Tang pemutus penemu kitai tau ngaga rumah sembiang Tuhan nyadi utai bukai. Cherita tu tadi udah nunjukka tuju ti manah ba pun tau nyadi jai ba ujung.  Kitai beterima kasihka cherita tu, lalu minta Jesus mega muru utai ti enda manah ari ati enggau runding kitai, awaka Roh Kudus ulih bekereja dalam kitai.    

 

~Can. James Juhari~