Jaku Ajar All Souls’ Day (Hari Ngingatka Orang ti Udah Mati dalam Pengarap) - Fr. Walter Macdaniel
Jaku Ajar All Souls’ Day (Hari Ngingatka Orang ti Udah Mati dalam Pengarap)
01.11.2025
Pemuka: Hari Pengingat ti Kudus enggau Pengadang ti Dalam
Menyadi dalam Kristus, lemai tu kitai begulu laban ti deka ngintu Hari Pengingat ke Orang ti udah Mati dalam pengarap tauka suah dikumbai kitai All Souls’ Day. Kitai ngingat dalam runding kitai sida ke udah nembuka pelanda sida ba dunya tu, semengat kaban belayan ke dikerindu kitai ti udah midang dulu ari kitai. Lalu lebuh kitai begulu baka tu ngenang pasal pemandak seput enggau pengidup ba dunya tu, siti tanya ti endang seruran deka ditanya kitai – ti nelai ari sukut ati kitai ti dalam: Nama Tuhan deka ingatka nembiak Iya? Kati kitai tau andalka perambu Iya ti mai selamat indah ke kaban belayan ke dikesayauka kitai nya mega?
Rasul Paul, nengah surat nuju sida di Rome, meri saut ti dalam tang tau merindang kitai ba tanya ti nyadika batang ajar ke lemai tu.
1. Tuhan enda nulak nembiak Iya: Semaya Sempekat ditegapka (Rome 11:1-2)
Paul berengkah enggau siti tanya lalu enggau terang nelah pasal penaluk Allah Taala ti badas ko ya:
"Nya alai aku nanya: Kati Allah Taala udah nulak nembiak Iya? Enda! Aku empu tu orang Israel, peturun Abraham, ari raban bansa Benjamin. Allah Taala enda nulak nembiak Iya, ke udah dipilih Iya kenyau ari pun." (Rome 11:1-2 BK)
Paul madahka iya meh kelai ti idup Allah Taala enda ngasuh sempekat ditanggam Iya enggau nembiak Iya balang. Iya lalu mai sida meretika utai tu nengah cherita nabi Elijah, ti ngumbai diri nyadi orang ke penudi ke tetap ati, tang Allah Taala udah ngalau "semina mimit aja orang agi tinggal, ke udah dipilih ulih pengasih". Konsep pasal mimit aja orang agi tinggal tauka “remnant” tu siti konsep ti tau nyadi pengadang ke tegap ba kitai: reti iya enda ngira ba jeman tauke renggat ni, enda ngira nama pen penguji ti datai nuntung, sekali ke orang ba dunya tu majak enda arap, Allah Taala tetap ngalau ke Iya empu semina mimit aja orang ke agi meruan tetap ati arapka Iya.
Nyadi ngenang kaban belayan kitai ke udah dulu midang, ke dikingatka kitai dalam sampi saritu, ti dikandalka kitai mati dalam pengarap, kitai patut lantang ati ba penemu; enti sida enggi Kristus, sida tu meh sama bisi bagi dalam mimit orang ke agi meruan —digalau ukai ketegal pemadas pengawa sida, tang ulih pengasih Allah Taala siku. Sekali ke enda sida bisi endur ba serega ukai bepanggai ba pemujur pengawa sida lebuh agi idup, tang ulih semaya ti sama ti enda kala berubah ke ditelah Paul maya nya menya nuju sida di Rome alai saritu mega kitai agi ngenang.
2. Tesangkut, ukai bereti lalu terus labuh: Pengadang ba Mulia ke jemah ila (Rome 11:11-12)
Paul udah nya dalam surat iya tu mai sida berunding pasal utai ke tau dikumbai penanggul—raban bansa Israel ke majak nulak Kristus—lalu udah nya ngasuh sida meratika utai ti nyadi nya ari tinjau Allah Taala enggau atur Iya ke besai agi ungkup dunya tu:
"Nya alai aku nanya: kati sida udah tesangkut ngambika sida enda ulih angkat agi? Ukai! Tang ari penyalah sida, pengelepas udah datai ngagai orang bansa bukai, ngambika orang Israel kepapas. Enti penyalah orang Israel udah mai berekat ti besai ngagai dunya, lalu penyeranta sida dalam roh, udah mai berekat ti besai ngagai orang bansa bukai, tentu besai agi ga berekat deka datai lebuh semua orang Israel dibai magang ngagai Tuhan!" (Rome 11:11-12 BK)
Paul madahka penimpang sida bansa Israel nya semina “tesangkut”, lalu tu enda pulai ke pengerugi. Utai tu dikemendarka Allah Taala nyadi awakka tau mai bansa bukai, ke ukai bansa Israel, tama dalam ruang bilik Allah Taala.
Buah penemu tu mega tau dikena kitai ba pendiau kitai enggau pendiau kaban belayan kitai ke udah dulu ninggal. Laban kitai suah meda pendiau pengidup siku-siku —ari segi pemerinsa, ari segi pendiau ti enda mujur, tauka pemati—lalu ngenang tu nyadi utai ti tau ngasuh ati tusah sereta irau. Tang taja pia, Paul madahka tu meh chara Allah Taala bekereja; nengah paradoks. Pengerugi tu semina enda lama aja lalu tu deka ngujungka kitai ngasaika penguntung ti besai lebuh pelan Allah Taala ti besai nya deka digenapka jemah ila. Pemati tauka utai ti dikumbai kitai penyilap nyadi ba pengidup orang ti dikesayau kitai ukai pengujung; nya semina dikira pengujung lebuh semua orang dibai magang ngagai Allah Taala nundaka perambu Iya —pemulai semua utai nyadi ke enggi Iya baru ti bemulia alai utai ke belaban ngelama tu nunduk magang ba baruh Iya.
3. Allah Taala penan kitai maya Tusah: Semaya Pengerindu Allah Taala ti Meruan (Masmur 94:14-19)
Lebuh kitai sinu ngenang kaban belayan kitai ke udah ninggal, kitai suah dikingatka enggau “pengirau” sereta “penyiru” ba pengidup kitai di dunya tu. Penulis masmur tu empu nulis ngarika pengasai ati kitai pasal tu, lalu udah nya nyaut nelah kuasa Allah Taala ti nyadika penan ba semua utai ke nyadi:
"TUHAN enggai ninggalka bala nembiak Iya. Iya enggai ngelengkaka sida ke endang pesaka Iya... Enti TUHAN enda nulung aku, aku tentu udah jampat lenyau ngagai dunya pemati. Ku aku, “Aku labuh!” Tang pengerindu Nuan ti meruan belama iya, O TUHAN, ngasuh aku ulih bediri tegap. Lebuh ati aku mayuh pengirau, Nuan merindang aku, lalu ngasuh ati aku gaga." (Masmur 94:14, 17-19 BK)
Genteran jaku tu nyerangkung semua batang ajar ari Rome 11: Allah Taala enda nulak nembiak Iya! Pengerindu ti enda puntan ke udah nyadi penan penulis masmur tu mega nyadika pengerindu ti ngenanka kaban belayan kitai ke udah dulu ninggal lebuh sida merinsa natka diri pedis, sakit, lebuh nyawa sida deka apus.
“Pengelengkas mupuk ngagai dunya pemati” munyi ku penulis masmur tu balat ngenakutka enti dikenang, tang penulis masmur nengah masmur tu meri pengadang ke kitai alai Allah Taala tentu deka nyelamatka semengat ti mupuk ngagai dunya pemati nya. Lebuh pengirau ba pengidup balat nepan peragam ati kaban belayan kitai ke udah ninggal, semaya pengerindu Allah Taala nya ti mai pengaga ba sida, lalu pengujung iya pengasih Allah Taala nya ke deka mai sida ngagai belelak ti meruan belama iya.
4. Jalai nuju Mulia: Pemaruh ati enggau Kangau ari Allah Taala (Luke 14:1, 7-11)
Ke pengujung, ngenang pasal Jesus, ti datai ngintu Sabat, meda bala ke datai betapat milih penuduk ke badas ke diri empu lalu ari nya Iya meri siti ajar ti bebatang pasal pemaruh ati enggau basa:
"Lebuh Jesus meda chara sekeda bala pengabang milih endur ti pemadu manah, Iya lalu madahka sempama tu ngagai sida: '...Laban semua orang ke ngeninggika diri, deka dikemaruhka, lalu orang ke ngemaruhka diri, deka ditinggika.'" (Luke 14:1, 7, 11 BK)
Nyadi ajar tu dikena kitai nampung ngena perening penemu Allah Taala ba dua raban ke bisi disebut dalam Rome 11 tadi:
Bansa Israel, ngaga diri lurus, tang udah nya enda lama sida dikemaruhka (digaga Allah Taala kieh).
Bansa bukai, ti dibai ulih pengasih Allah Taala sereta enda patut bulih penuduk ke dipebasa, tau dimuliaka.
Tu meh pemendar ti besai sereta tau meri pengelantang ngagai kaban belayan kitai ke udah ninggal: selamat sida ukai bepanggai sekali ke enda sida udah ngulih penuduk ti pemadu manah (ngangkatka diri tinggi ba mua orang Kristian ke bukai), tang ba sida ti ngambi penuduk ke pemadu baru ianya bepanggai enggau ati ti baruh ba Kristus. Lalu dalam pemaruh nya deh sida udah ngelempaika diri ba pengasih Allah Taala enggau penuh. Lalu ba sida, semaya tuai rumah ke nyebut: "Unggal, duduk ke atas kitu ke agi”meruan. Pengangkat sida ngagai mulia ukai ketegal status sida ba gerija tauka pangkat diberi lebuh sida agi idup didunya, tang ulih kangau Allah Taala ke tiap iku kitai nuju ngagai pengangkat ari mati orang ti lurus.
Penutup: Semaya enda ulih diubah
Ba hari pengingat ti kudus tu, aram meh kitai sama bepegai rat ba pemendar ti penudi enggau bemulia beduduk ari ajar St. Paul ti madah:
"...Laban pemeri enggau kangau Allah Taala enda ulih diubah." (Rome 11:29 BK)
Allah Taala enda deka ngubah runding Iya. Sempekat pengerindu Iya nya siti “pemeri” enggau “kangau” ti enda ulih diambi Iya baru. Sida ke mati dalam pengarap enda liar semengat ba batang mandai alai sida begunaka kitai nyau enda beige-iga, ulih pengirau, ngintu pemati sida; sida udah ditanggam ulih semaya Allah Taala ti enda beginsit enggau enda berubah, ti udah tetap lebuh ditanggam Iya enggau apai pengarap kitai lalu digenapka ulih Jesus Kristus ba kayu regang.
Aku besampi awakka kitai, dalam kitai ti majakka pejalai kitai didunya tu, tau mega ditegapka ulih penetap ti sama, lalu awakka semaya Kristus nya nyadika pengadang ti meruan ba kitai siku-siku.
Amen.
Comments
Post a Comment